【探班】炎明熹演唱會｜Gigi因父母搵師傅再改名 回應粉絲被Cut飛風波：冇幾耐就解決咗 覺得好幸運

今個星期六（7日）就係炎明熹Gigi第一場個人演唱會嘅大日子，而佢亦都加緊採排，練習唱歌之外亦都努力練舞，雖然佢就覺得時間唔夠，但係都會努力練習，為演唱會出盡全力。Gigi亦都回應日前有Fanclubs成員指被Cut飛，大感無奈不過所幸問題好快就已經解決，亦都希望令自己更強更有能力，未來可以開更多場演唱會。

嚟緊週末（7-8日）就係Gigi首場演唱會《Gi-FORCE》舉行嘅日子，Gigi 指演唱會所有事宜已經準備得七七八八，仲透露今次會有一男一女2位嘉賓，其中一位曾經合作過。經過今次排練，Gigi亦都同Dancers老師變得熟絡，雖然排練時間唔足夠，但佢就認為係好好嘅嘗試：「希望自己可以有一個比較良好嘅表現，希望自己會加油！」

另外，提到早前18歲換身份證時改名「王爖熹」，Gigi就話其實係父母喺佢細個嗰陣已經有嘅意願，不過因為一直未有啱心水嘅名字所以先一直未改，而今次亦都搵嚟師傅再次改名，但係Gigi就未知新名嘅含意。至於被傳買樓一事，Gigi就笑言：「我都想知我買咗啲咩樓啊！」，更加反問係咪講緊將軍澳。Gigi就解釋中學開始一直都住喺將軍澳，不過個人就比較鍾意元朗嘅環境：「鍾意一啲郊外嘅環境，因為嗰種空氣或者環境會令我覺得好舒服，所以我會比較想喺嗰種地方生活。同埋無論屋企係大定細，最緊要係入到門口可以放鬆晒一日嘅疲勞。」

早前有傳Gigi Fansclub被cut飛，Gigi就表示無奈，幸好事情好快就已經解決；而佢亦都希望自己未來更加有能力可以再開多啲演唱會回饋Fans嘅支持！