【教揀煲】一個煲做齊煮飯炆餸煲湯 壓力煲同真空煲應該點揀？

蘋果動新聞

廚房用品唔少得煲同鍋，最理想當然係有齊大煲、小煲、電飯煲同湯煲。但香港地方細，真係未必個個家庭都有咁多地方。想知有咩煲可以一舉三得？喺YouTube有近29萬粉絲、開設教煮頻道「MamaCheung 張媽媽廚房」嘅李慧芝（張媽媽），今集就會推介兩款可以一次過做齊煲飯、炆煮同煲湯三種功能嘅煲，幫大家慳錢慳地方！

兩款煲分別係壓力煲同真空煲。壓力煲嘅原理就係將食物鎖喺高溫高壓嘅環境下烹調，所以烹調速度特別快，例如炆牛腩只需要十幾分鐘，比起用傳統嘅炆燉煲快得多。至於真空煲就係利用保溫原理長期保持煲入面夠熱去煮熟食物，慢慢炆熟食材，保持到食物嘅質感之餘，仲唔使睇火。其實兩個煲最大嘅分別就係慢煮或快煮，不過壓力煲要注意嘅細節就較多，例如要留意煲蓋上嘅洞口有無阻塞，一旦阻塞就有機會引起意外！而真空煲雖然操作更方便，但事前事後功夫就較多，另外速度都會較慢。

所以點揀，最緊要都係睇你自己嘅煮食習慣。追求速度嘅不妨選擇壓力煲，快快手煲到飯、仲炆到餸；而鍾意飲老火湯嘅，就可以考慮真空煲，返工前處理好食材、煲約15至30分鐘，之後放入真空煲，飲前再翻煲即可。雖然步驟就多少少，但唔使睇火就飲到老火湯，絕對值得！

製作：倫星揚

張媽媽分別推介壓力煲同真空煲，兩款煲都可以做到煲飯、煲湯同炆菜嘅功能。
張媽媽分別推介壓力煲同真空煲，兩款煲都可以做到煲飯、煲湯同炆菜嘅功能。
壓力煲利用高溫高壓將食物煮熟，咁可以將食物快啲煮熟。
壓力煲利用高溫高壓將食物煮熟，咁可以將食物快啲煮熟。
真空煲就利用保溫原理將食物煮熟，保持食物嘅質感同味道。
真空煲就利用保溫原理將食物煮熟，保持食物嘅質感同味道。
張媽媽話用壓力煲時要注意蓋上洞口清潔。
張媽媽話用壓力煲時要注意蓋上洞口清潔。
真空煲速度慢啲，但勝在唔使睇火。
真空煲速度慢啲，但勝在唔使睇火。