【海濱喪屍館】荃灣死場喪屍館搶先試玩 沙律玩後感：「估唔到入面唔只有喪屍」

一個封塵超過5年嘅荃灣海濱廣場，一年一度嘅哈老喂萬聖節，一隻經典嘅喪屍遊戲《Dead Rising》，令到實境喪屍館「Dead Rising: Reality」成為近來城中熱話。10月13日就正式開幕，記者和靚女沙律早前搶先殺入這個全港最大死場，體驗一下這班喪屍哇鬼如何活化這個海濱廣場。

搶先睇全新GadgetGuy專頁｜fb.com/gadgetguy.appleseed/

喪屍館會用到廣場的二樓和三樓，試玩部份玩到其中頭兩區：時裝店和茶餐廳。預計正式開放的時候會有7至8個區，包括超級市場和海濱廣場最有名的溜冰場等等場境。連恐怖game《The Evil Within》都有玩的試玩員Charlotte沙律（張沛樂）自問膽量唔差，但行到第一個轉角位已嗌爆咪。「估唔到喪屍館會有真人！」

原來呢個喪館game唔只有喪屍，還有生還者角色，被喪屍追殺的生還者到處跑，演員入戲，投入感大增。雖然喪屍和玩家不能互相攻擊，但也有喪屍圍食俏護士，OL被喪屍醫生帶走的情節發生。每隻喪屍都有角色，而且數目眾多，短短兩個區已經數到有20隻，每個驚嚇位都有幾個演員和喪屍衝出來招呼玩家。對於初來海濱廣場就玩喪屍館，沙律最欣賞演員夠搏。「我第一次嚟呢個商場，仲會見到一啲舖頭嘅玻璃窗等等，感覺比較真實，入到舖既空間都算大，喪屍演員跑來跑去幾好氣氛，同埋佢哋真係好投入好好戲，啲喪屍同人嘅演員真係出盡法寶、瞓晒地嚇大家。」

有讚都有彈，始終喪屍館要控制玩家的行走路線，加了很多圍板，玩落其實唔係好感受到置身於海濱廣場。不過始終試玩的只是頭兩關，預計之後的關卡喪屍會越來越喪，驚嚇度亦會倍增，這方面就有待入場人士親身體驗了。

「Dead Rising: Reality喪屍圍城‧香港站」
日期：10月13日至10月31日
開館時間：
星期一至五下午4:00 – 晚上11:00（最後入場時間：晚上10:30）
星期六、日、公眾假期及10月29至31日：下午1:00至晚上11:00（最後入場時間：晚上10:30）
票價：
$238（任何日子適用）
$218（星期一至四入場時間適用，公眾假期及10月31日除外）
早鳥票價：即日起購買2張或以上$238門票，即享優惠價每張$158

記者：馬子聰
攝影：伍永健、張志孟