【男友等吓先】出爐視后李佳芯 結婚未係timing

噚晚憑《BB來了》一劇奪視后嘅李佳芯（Ali），而男友陳炳銓都有睇女友攞獎，好戥對方開心。至於Ali攞獎後，會否效法蕭正楠同黃翠如講結婚，佢就表示timing未到唔諗住，仲話演員係條好長嘅路，睇嚟事業心重嘅Ali，男友陳炳銓要等吓先啦！

出爐視后李佳芯，噚晚得獎後受訪，問到對於自己攞獎有冇驚喜？Ali話︰「其實本身有信心，後尾發覺獎項太難估計，所以覺得係攞最喜愛角色（即︰最受歡迎電視女角色）因為我發覺呢一年，唔同角色累積到，發覺真係好多人鍾意我，到後尾攞大獎，係一個驚喜。」

問到會唔會同男友慶祝？佢話︰「嘩！今日返去都已經好攰，應該唔會慶祝，但我哋聽晚（即︰今日）本身《殺手》有個慶功宴，佢哋喺個group度一早已經講，希望可以一齊慶祝埋，畀佢哋講中咗。」

蕭正楠噚晚公佈結婚，問Ali幾時到佢呢？Ali笑住話︰「人哋公佈結婚係人哋嘅事，我嘅timing應該未到嘅，同埋之前都有答過，會朝呢個方向行。」至於會唔會加片酬？佢話︰「TVB難啲喎，我哋有約喺身，加片酬有啲難度，但其實我覺得喺公司拍劇，唔係為錢，因為公司都帶畀我好多嘢，尤其是呢6年，錢梗係搵出面㗎啦，拍公司嘅嘢真係唔係講錢。」仲有咩角色想挑戰？Ali就話未做過嘅角色都想挑戰，有啲做過都可以有唔同嘅演技，而且演員係一條好長嘅路，仲有好多進步空間。