【細個跟住出活動】阿嬌外傭退休晒全家福 21歲妹妹終於有新相？

香港地唔少家庭都有請外傭姐姐幫手打理家頭細務，有時遇著啲唔好嘅又真係幾頭痕，好似之前鄭敬基自爆做咗16年嘅家傭偷嘢之餘，仲疑似落降頭，諗起都驚驚。

不過，唔係人人都咁唔好彩，「阿嬌」鍾欣潼今日喺ig上載一張「全家福」，話做咗20年嘅工人姐姐要退休喇，搞到佢勁唔捨得，留言﹕「想喊~~Estella要退休番菲律賓喇，好唔捨得！」連拍檔阿Sa蔡卓妍都話﹕「Tell her I will miss her very much too la.」

相中除咗有阿嬌、工人姐姐外，仲嬌媽同一位靚女，有眼利網友問﹕「右面是嬌妹嗎？last time I saw her picture she was only a baby!」阿嬌一歲喪父，媽媽之後改嫁，並育有一女，而阿嬌呢位同母異父嘅妹妹鍾芝茵小時候都有跟阿嬌出活動，仲生得好可愛。(相關新聞﹕

https://bit.ly/2QWzmqI

)但嬌妹日漸長大，如今年已經21歲，阿嬌亦好保護妹妹，擔心影響對方，一直唔俾佢出鏡；去年就有大陸網誤傳阿嬌妹妹玩淘寶直播，但屬流料。而今次呢位靚女五官、輪廓都同阿嬌十分相似，但好可惜……呢位都唔係阿嬌妹妹，經理人Mani今日回覆《蘋果》話﹕「唔係，係表姐。」