【電影還原事件】近藤真彥背中森明菜與梅艷芳交往 多次出軌成藝能界賤男

電影《梅艷芳》票房成績亮麗，更有唔少人睇到眼濕濕，但係戲中部份情節被指同事實有出入，例如有哥哥張國榮歌迷指出，哥哥出道比梅姐早，戲中講到哥哥登台觀眾反應不及梅姐並唔成立；另一個引起討論嘅情節，係梅姐同日本歌手「後藤夕輝」嘅一段感情。戲中後藤與梅姐一見鍾情，後來卻因為事業而分開。

梅姐90年代接受黃霑及葉玉卿嘅《花弗新世界》訪問，提到21歲時有過一段異地戀，對方係圈中人，戀情喺香港開始再延續到外地，但係後來演變成三角戀，對梅姐好大打擊，甚至話一度「唔再相信男人」。

現實中，梅姐盛傳同日本歌手近藤真彥有過一段情。1984年，紅遍港日嘅近藤真彥來港開show，喺酒會上認識梅艷芳，一年後二人再遇終於撻著。據知事業如日方中嘅梅姐為見男友，一年間飛日本7次拍拖，甚至當年唔係旅遊熱點嘅北海道，梅姐都跟埋去陪近藤真彥開演唱會。

不過，當時近藤真彥被指同偶像歌手中森明菜因拍戲一早撻著，梅姐因此變成小三，無奈退出。後來，緋聞多多嘅近藤真彥再被傳媒影到同另一女星松田聖子喺美國幽會，報導出街後中森明菜更割脈自殺，好在最終救得返。

更難譜係，近藤真彥喺中森明菜獲救後，要求對方出席記者會，仲暗示係公布婚訊。點知近藤喺記者會上擺中森明菜上枱，要佢否認割脈同感情事無關。1994年近藤真彥同圈外人結婚，愛巢竟然係中森明菜買俾近藤真彥嘅豪宅！舊年日本八卦雜誌影到近藤真彥偷食中女，近藤承認同對方來往5年，並宣佈暫停演藝工作。

雖然梅姐被近藤真彥hurt爆，但係梅姐患癌後都專程飛去日本見舊愛一面。近藤亦有出席梅姐喪禮，據知佢情緒甚為激動，梅姐離世後幾年都會專程來港拜祭。到底近藤真彥對梅姐係咪認真？只有佢先知。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！