【Gary Tong唐奕聰逝世】7人成軍 太極成員近況 雷有曜為政治發聲 朱翰博曾拋妻棄子戀戴夢夢
昨日猝逝的音樂人唐奕聰(Gary Tong),本身係80年代大熱嘅太極樂隊成員。太極組band至今超過35年,但係早於1995年推出Utopia專輯後,成員開始各自發展,各人亦有不同生活方向。
主音-雷有輝(Patrick)
未組成太極之前,Patrick已經參與廣告歌主唱同埋和音工作,太極大紅以至低度運作後,Patrick繼續做
和音,經常喺演唱會樂隊陣容見到佢。同時Patrick都有參與音樂製作,本來去年舉行首次個人演出「PAT Music Over Rainbow音樂會」,但因為疫情而要延期。
主音-雷有曜(Albert)
Patrick嘅哥哥,同樣有參與和音工作。1993年Albert宣布離開太極移民加拿大,多年後交代係因為政治理由而移民。太極1999年及2012年的重組演唱會,Albert都有回港參與。Albert十多年前受洗,積極參與教會事務,近年留意到香港政治情況,喺加國參與支持抗爭者活動,早前喺一個線上音樂會獻唱《願榮光歸香港》。
主音/結他手-鄧建明(Joey)
有睇Viu TV節目Chill Club都知Joey Tang係演出樂隊領班兼音樂總監,有時又會唱兩咀。獨立發展嘅Joey喺圈中幾吃得開,樂隊領班、結他手、歌曲監製統統有份,仲做過唱片公司音樂部副總監,得閒又會同圈中人打golf。Joey囝囝Justin同樣有音樂天份,曾經喺太極演唱會同uncle們jam歌。
結他手-劉賢德(Ernest)
自幼對音響器材有興趣,夾band前都係喺Hifi店做嘢,有個花名叫Hifi德。太極90年代中休息期間,Ernest發展Hifi事業開設專門店,近年更加為歌手嘅發燒碟做音響顧問。
低音結他手-盛旦華(蛇仔)
第一代太極隊長,行事低調,近年除咗喺太極重組音樂會上現身之外,甚少公開露面。蛇仔而家係音樂監製,仲係香港華納唱片製作總監。
鼓手 - 朱翰博(Ricky)
太極成員分頭行事之後,Ricky 1998年創立音樂學校,並引入英國流行音樂樂器試。本來都係短調之人,但係2015年被傳媒揭發同年輕19歲嘅戴夢夢發展忘年戀,Ricky當時太太更向傳媒爆料話佢地未離婚,並且2次撞破Ricky同戴夢夢約會。Ricky就話協議分居之後先發展新戀情。呢段關係維持咗5年,戴夢夢試過同Ricky飲大兩杯後嗌交兼剝裙,亦會幫手照顧Ricky同前妻所生、有過度活躍症嘅囝囝。舊年有傳媒踢爆Ricky同戴夢夢分手,女方搭上商界才俊,戴夢夢承認分手,但係同Ricky仍然友好。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!