雅虎香港新聞 【Yahoo Lunch K・Backstage】不一樣的曾樂彤《不一樣的我》
牛年來臨第一集【Yahoo Lunch K】請來嘉賓曾樂彤，同咪霸吳林峰一齊享受一個輕鬆嘅下午。
今次有機會同曾樂彤傾吓計，當然少不免要講吓《不一樣的我》呢首新歌啦！
呢首本來屬於張柏芝嘅作品，喺音樂永續呢個計劃入邊曾樂彤就同監製Cousin Fung一齊揀咗呢首作品，重新演繹。
講起翻唱一首經典金曲，曾樂彤話呢一個都係一個挑戰，但係經由監製重新編曲之後發覺原來曲風可以截然不同，將《不一樣的我》當咗一首新歌咁唱，就好似冇咁大壓力。
曾樂彤又提到，原本張柏芝演繹嘅版本俾人嘅感覺係同男友分手後要尋找新嘅一個自己，但當中仲帶住點執着。由監製Cousin Fung重新編曲後嘅版本，就希望歌曲可以帶來一種已經搵到自己一片天空，輕鬆啲嘅感覺，成功帶給人一種「不一樣的感覺」。
問到曾樂彤喺今年會唔會有咩新計劃嘅時候，各位fans唔使等到頸都長喇，因為嚟緊三月佢就會推出全新EP，入面當然包括幾首過往嘅作品，但相信最令人期待嘅一定係將會同EP一同推出嘅新歌喇。
筆者當然唔會錯過問吓關於新歌嘅問題啦，原來呢隻歌嘅DEMO早喺2019年嘅時候已經收到，直至到今年呢首新歌終於由佢親自填詞推出，仲透露呢隻歌會承接住《存在》、《永恆少年》、《天空之門》講關於成長嘅主題。
除咗推出新EP之外，梗係要問吓今年仲會唔會有關於電影電視劇嘅幕前演出計劃啦。
2020年參演VIU TV劇集《熟女強人》得到好好嘅口碑同迴響，令觀眾留意曾樂彤嘅演出。其實曾樂彤早於成為歌手之前，修讀表演藝術嘅佢已經參與過不同嘅舞台劇、微電影同MV嘅拍攝，咪霸吳林峰喺節目入面問曾樂彤，如果要佢喺唱歌、拍戲、跳舞同主持入面揀一樣最想喺今年做嘅嘢會係邊樣，曾樂彤選擇咗拍戲。
筆者都有問到，演員嘅身份對比起歌手嘅身份感覺上有咩唔一樣，曾樂彤就話拍戲嘅時候感覺上會比較輕鬆自在。
喺新嘅一年相信曾樂彤會繼續為大家帶來更多驚喜，亦希望快啲可以喺電影同電視入面見到佢嘅出現。
各位fans記得留意曾樂彤喺三月將會推出嘅EP同新歌喇！
睇更多YAHOO LUNCH K BACKSTAGE內容：
