【Yahoo Lunch K・Backstage】吳浩康：樂壇邊有死？百花齊放就真！

好高興上星期邀請到吳浩康(Deep) 嚟到【Yahoo Lunch K】唱唱歌，同大家分享新歌《十倍速》同埋今年嘅計劃。

2021年上半年，Deep 完成咗一部電影嘅拍攝工作，下半年應該會專注以都市人為主題推出四至五首單曲，而第一首歌正正係剛推出，由Dear Jane 嘅 Howie作曲、林若寧填詞嘅《十倍速》。 佢仲透露今年嘅創作搵嚟好多佢非常欣賞嘅音樂人合作。Deep 直言，當初等待 Howie《十倍速》完成，送到佢手上時既興奮又期待，猶如拆聖誕禮物一樣嘅心情，第一次聽呢首歌已經打動到Deep，佢非常感動。Deep亦提到，之後嘅幾首單曲都有一啲合作過嘅班子，如周初晨、徐浩；亦有一啲係從來未有機會合作嘅新夥伴如Cousin Fung，期待喺音樂上擦出新火花。

筆者問，有咩長遠目標想達成呢？ Deep 好快就回應：「紅館吧，一直都希望能向紅館進發開演唱會。」佢接住回應：「但係經歷呢一年半嘅時間（疫情），眼界反而廣闊咗，看待事物嘅角度有啲改變。分分鐘而加舉辦一個網上音樂會會比紅館更多人睇。呢段時間周圍嘅事帶畀我好多啟發。」「當然紅館係具指標性，係我一直嘅心願，希望將來可以唱晒香港每一個場地。」

最後筆者問Deep，對經常有人提及「樂壇已死」有咩看法呢？佢秒回：「未死！邊有死？！」「而加香港有Mirror 、林家謙、Serrini； 資深一啲有馮允謙，邊有死？！每一位都非常獨特，充滿風格，百花齊放。我認為呢兩年反而多咗人聽廣東歌，尤其是年青人，佢哋不再只係聽歐美或者韓國嘅流行曲。」佢補充：「唔係韓國歌曲唔好，正正因為佢哋好好，先能夠將我哋嘅觀眾吸引過去。但起碼而加我哋都開始百花齊放，出現好多品質優良嘅廣東歌。」Deep笑指由四大天王時代已經有人話「樂壇已死」，但樂壇「死」咗咁耐都未死，就證明時辰未到。佢希望大家可以花多啲時間，留意多啲廣東歌。因為香港音樂圈仲有好多優秀嘅音樂人默默耕耘，不論新人舊人，依然投放非常多嘅心血同努力製作音樂。Deep 再自嘲：「喺香港，做音樂嘅人，腦袋都係唔太正常嘅（笑），香港有大把比起做音樂更賺錢同穩定嘅行業，但係仍然有好多人堅持做呢一行，對仍然奮鬥嘅人嚟講實在太唔公平，所以樂壇未死。而加廣東歌唔缺乏人才，只係缺乏觀眾。誠意邀請各位聽眾多啲聽廣東歌吧。」

睇更多YAHOO LUNCH K BACKSTAGE內容：

【Yahoo Lunch K・Backstage】小新：不．要．再．播．錯．歌．了！

【Yahoo Lunch K・Backstage】ToNick：有好歌就有樂迷 香港樂壇不會死！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！