雅虎香港新聞 【Yahoo Lunch K・Backstage】小花今年繼續寫歌 挑戰不同曲風
上星期四【Yahoo Lunch K】有咪霸吳林峰同嘉賓譚杏藍(小花) 一齊唱歌傾計，為觀眾帶來一個有靚歌聽嘅下午。
今次邀請到花姐，當然唔少得要佢唱多幾首好歌畀我哋聽啦！其中一首就係去年花姐為愛貓Soju寫嘅歌《去吧孩子》，
呢首歌係同男朋友恆仔一齊合作完成，為Soju送上的最後一份禮物。
至愛嘅寵物離世對主人嚟講係最痛嘅事，但係小花分享Soju嘅離去令佢學懂咗珍惜嘅重要，而家都花多咗時間去陪伴屋企嘅貓貓。佢亦感謝上天喺Soju離開之前可以好好咁照顧佢，陪佢渡過最後嘅時間。問到會唔會再考慮領養寵物，小花就話隨緣喇。
有留意開小花嘅朋友一定會見到佢係咁做運動，但係原來小花以前係一個行樓梯都會喘氣，中學陸運會都會匿埋一二邊嘅人黎。直到同朋友開始發展健身室嘅事業，作為宣傳部負責人嘅小花就決定操Fit自己做生招牌，嚟緊佢仲會考埋健身教練牌添！
小花形容今年會係充滿挑戰嘅一年，健身室台灣嘅分店今年會開幕，亦希望今年音樂上會係「多產」嘅一年，會嘗試多啲唔同類型嘅曲風，亦都會同TONICK嘅鼓手晨曦合作寫多啲歌。
講起寫歌，筆者就順帶問下同趙善恆（恆仔）一齊寫歌時，多咗情侶呢個身份喺入面，會唔會因為睇法唔一樣而有爭執呢？
估唔到呢對拍咗拖八年嘅情侶連喺音樂上都係「天作之合」，小花話同恆仔一齊寫歌嘅時候，各自坐喺琴前面往往就可以好自然完成一首歌！
恆仔自導自演嘅《一秒拳王》上畫，小花亦有份演出，畀好多人話似大姐明嘅小花今次喺《一秒拳王》入面嘅角色，終於可以攞正牌做「大姐明」!
小花對恆仔嘅愛喺佢不斷大力推《一秒拳王》就可以睇到，佢除咗喺鏡頭前大力推，鏡頭後同工作人員又推多次，返屋企又用social media再推，真係好努力想多啲人入場睇，除咗香港音樂，香港電影業都好需要大家支持，大家得閒就去睇戲吧。
睇更多YAHOO LUNCH K BACKSTAGE內容：
