雅虎香港新聞 【Yahoo Lunch K・Backstage】陳葦璇「戀」上戇直陳天翱 BBQ邂逅結緣
大家好！今次【Yahoo Lunch K】有我咪霸 Waiwai，仲請到陳葦璇同陳天翱 (Eagle) 帶埋佢哋嘅新歌《See You In My Dreams》上嚟同大家傾偈唱歌！
有留意開兩位嘉賓嘅朋友，相信對於佢哋曾經喺《全民造星》參賽者呢個身份一啲都唔陌生。正當大家以為葦璇同 Eagle 係因為節目而認識之際，原來佢哋嘅認識並唔係透過比賽，而係一次 BBQ 聚會！之後喺拍攝節目《囝囝女女730》時再次重逢，葦璇當時就主動邀請 Eagle 參與佢同 JNY 一齊創作嘅新作品《See You In My Dreams》，Eagle 一口答應，最後促成咗今次嘅合作。
今次嘅作品無論音樂類型定風格都同葦璇以往嘅創作好唔一樣，葦璇就表示以前嘅作品風格上比較貼近大家聽開嘅廣東流行曲，但最近嘅創作比較多用外國音樂做參考，慶幸公司亦十分支持佢嘗試做唔同類型嘅音樂。新歌最後選用咗 R＆B 嘅風格去呈現，直言恨做浪漫情歌好耐嘅葦旋，今次終於可以一償所願喇！
另一方面，今次合作嘅形式對 Eagle 嚟講亦係一個全新嘅體驗。Eagle 喺今次嘅新歌中第一次嘗試唱廣東話rap，仲透露曾經因為咬字問題，令到錄音嘅時候錄咗幾十 take 先完成到。好在過程中有 JNY 同葦璇教路同提點，最後先有今日大家聽到嘅版本出現。
新歌 MV 入面，葦璇飾演一位火星人，喺探索地球嘅過程當中漸漸愛上咗地球人 Eagle。兩位喺 MV 拍攝當中有好多好甜蜜嘅互動同趣事。被葦璇形容為「戇直男」嘅 Eagle 就表示自己演戲經驗唔多，要拍甜蜜戲份難免比較生硬，一開始全靠葦璇帶住佢入戲，熱身過後就開始習慣，過程全靠唱歌、玩遊戲、講笑嚟保持輕鬆自然嘅感覺。
Eagle 作為今年新人，過去主要擔當幕後工作，究竟係咩嘢令佢決定走向幕前呢？Eagle 就話係因為過往有部份創作嘅作品一直冇遇到合適嘅歌手，同時都覺得唱返自己寫嘅歌能夠更直接表達歌曲嘅原意；參加《造星》令佢踏前一步接觸到更多幕前表演嘅機會，得到大家唔錯嘅評價後對幕前表演亦有更大信心，所以佢就決定今年正式出道，目前發佈兩首主打歌《LEAVE THE WORLD BEHIND》同《Our Last Day》，以歌手身份去演繹自己喜歡嘅音樂！
參加完《造星》之後對葦璇嘅音樂創作又有咩影響呢？佢自言覺得以往嘅歌都比較嘈，好少可以投放自己個人情感喺音樂上，令到作品較為單薄、唔夠立體。比賽令佢多咗去思考自己嘅表演，希望可以做到更有內涵嘅音樂。葦璇創作《本日終了》同《See you in my dreams》之後覺得自己嘅作品依然比較幼嫩，希望可以做得愈來愈好。而家嘅佢非常積極參與每首歌製作過程，就算歌曲唔係自己創作都想由自己出發去構思，將自己嘅想法加入到作品中，希望最終嘅成品能夠呈現到自己心目中嘅畫面。
問到佢哋嚟緊有咩大計，兩位都話繼《See You In My Dreams》後各自將會再推出新歌，目前已經喺製作當中喇。Eagle 就希望今年年底可以推出個人 album，所以而家正係密鑼緊鼓咁閉關做歌中；至於葦璇嘅新歌將會係一首令人期待嘅跳舞快歌！
雖然節目已經完咗一段時間，但係一個人嘅成長唔應該因為比賽嘅完結而停止，三個人分別參加同一個比賽後，各自都喺唔同嘅地方努力，一切嘅努力只為咗可以帶更多好嘅表演同原創音樂比一眾樂迷欣賞。大家記得聽佢哋嘅新歌之餘，日後都要繼續密切留意佢哋各自嘅新作品啦！
睇更多YAHOO LUNCH K BACKSTAGE內容：
