一度極速上位！「東涌羅浩楷」利愛安及「女版曾比特」徐麟疑被TVB投閒置散

每年嘅香港小姐競選，除咗一些高質佳麗夠晒吸睛之外，最惹人熱議嘅一定係另類佳麗，近年最為人記得嘅一定係2021年落選港姐「東涌羅浩楷」利愛安（Kirsten）及2022年港姐五強「女版曾比特」徐麟（Astrid），二人一開始已經備受網民關注，其後更先後獲TVB賞識簽約成旗下藝人，一度極速上位，不過佢哋最近都好似甚少露面，疑似被TVB投閒置散。

「東涌羅浩楷」利愛安（Kirsten）縱然落選2021年香港小姐競選，但獲TVB賞識簽約成為旗下藝人，兼迅速被安排擔任明珠台資訊節目《Top 10 Anything》主持，及加入處境劇《愛·回家之開心速遞》飾演Liza（姜麗文飾）外傭好友Naomi，不過由於姜麗文戲份減少，連帶利愛安出鏡機會亦減少，已有大半年冇喺劇集露面。有報道指仍於TVB官方網站女藝員名單嘅佢最近已經退出劇組，早前佢仲同哥哥Lenar及男友返菲律賓探親，亦大方曬出同男友合照。從照片中睇到留有爆炸頭嘅利愛安曬到鼻頭都紅晒，但仍擺出親切燦爛嘅笑容，睇嚟相當開心。

至於另一「爆炸頭」代表徐麟，喺頭三輪面試均以爆炸頭示人，結果成功獲得網民關注。徐麟五強止步後，仍獲TVB賞識簽約成旗下藝人，迅速被欽點擔任《開心無敵獎門人》「獎老」一職，憑半鹹半淡廣東話成功搶鏡，不過之後佢就甚少幕前演出機會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！