【一見不鍾情】美研究：最少見面4次先會真正愛上

睇戲嗰陣，好多男女主角一見面就fall in love，經典啲就有電影《鐵達尼號》，文青啲就有電影《 情留半天》，近期啲就有韓劇《太陽的後裔》宋仲基對宋慧喬一見鍾情，但到底現實又會唔會發生呢？

美國Hamilton College於是就做咗個研究，搵咗22個單身男女，畀佢哋睇112張相，而入面有一半係靚仔靚女嘅相，要參加者反覆睇呢啲相，研究員就會用9個級別去量度佢哋腦部反應。

最後就發現，當佢哋喺第4次睇同一張異性相嘅時候，大腦負責快樂同愉悅部分非常活躍，比起前3次活動得更犀利，所以研究人員就推測其實要見到第4次，先會真係愛上對方。

嗱，但係個研究係睇相，見真人可能又會有唔同呢。同埋，其實單向嘅一見鍾情好常見，你試吓畀我無啦啦遇到個顏值有如彭于晏或者「黑寡婦」 Scarlett Johansson嘅靚仔靚女，我一定即時心心眼呀話你知。

講真，總結戲劇嘅一見鍾情，我發現雙向嘅一見鍾情都係男女神嘅玩意， 2個顏值都如此高梗係容易一見就愛上啦，我呢啲凡人都係繼續做吓兵仔，陣間去發個夢， FF吓女神會第4次見面就鍾意我啦⋯⋯（如果成功出到第一次的話）