一間公司賤起上嚟，其實真係可以無底線……

話說我月頭辭咗職，理論上兩個月通知，三月尾就走得。我自己其實想早一個禮拜走嘅，但公司就想請到人先比我走。

至於點解想辭職，在此不詳述，但大概係：第一，因為我有一個好癲好癲嘅老闆，真係好癲。第二，係當初請我嗰陣話係Management Trainee，又話做完呢個Project想調去邊做咩位都有得傾；點知做咗兩年，完全睇唔到有任何升職嘅可能性，我總唔可以靠佢年年加薪抗通脹算數架？再加上本身佢講到間公司個集團幾大幾大，原來只係有少少財務上嘅關係，一直就掛名係跨國財團子公司，你話邊有可能升我職去個集團其他公司做嘢？總之一句講晒，份工就係存心欺騙，貨不對辦。

今日我見都辭咗職成個月，都仲未定到幾時Last day，就問吓個HR Manager啦。

「我想早走……」（未講完）「公司無同意架喎！邊個話比你早走？」「……咁我都可以早走架嘛？」「得，賠錢囉。」

講到呢到已經好躁，平時日日一齊食Lunch有講有笑，都有兩年交情吖，洗唔洗講到咁串呀？

「咁賠囉，你當我28號Last Day。」「但你返工返到24號咋喎，之後幾日係公眾假期，得嗰幾日糧你都同公司計？」

講得真係好笑。如果真係「得嗰幾日糧」咁少，咁你又同我計？同埋你講到明要我賠錢早走（如果雙方同意早走先唔洗賠），如果我真係計到24號，加埋倒賠Short notice，一來一回係八日糧呀哥哥。

後尾佢見勢色唔對，驚我個癲老闆唔比我早走會怪罪於佢，就同我講：

「你有咩咁Q忙要早走嗰幾日呀？」

屌呀。你係咪唔信自己公司個HR Manager會咁講嘢？未聽到之前我都唔信！我有幾Q忙唔洗關心喇多謝，都講咗最多咪賠錢，私人生活其實本身講亦無妨，但洗唔洗用到「有咩咁撚忙」幾隻字呀？

我聽得出其實我走之前都唔太樂觀會請到人，所以佢又走嚟勸我：

「其實都比我哋坤咗入嚟兩年啦，都唔差在留多幾日。」

頂佢個肺。佢都知自己當初請人係呃返黎架咩？平時幾度縮、Chur人Chur到盡都唔計喇，反正都差唔多走，但佢仲要不知廉恥話既然坤咗就唔差在留多幾日，即係姦開有條路再擘大脾比你執多劑咁呀？？

故事講到呢到，CFO就搵我同我講：「其實而家都仲未請到人，不如你留多一個月幫手啦，三月尾個禮拜當放你No pay leave，唔洗你賠錢啦好無？」

嘿，咁大方呀？呢啲咁嘅公司，你話我會點答佢吖嗱？

（嗱！以上係我用第一身寫我朋友嘅故事咋！我的朋友不是我呀！）

************************************

（原文刊於輔仁媒體）

Facebook專頁： b612lpp

Instagram：b612lpp

Tumblr：b612lpp

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」