丁子朗再變造型被網民嘲整容 力勸停手：靚仔又如何？唔係最真嘅你

丁子朗參加2016年《香港先生選舉》勇奪亞軍、「最上鏡先生」及「最受歡迎香港先生」入行，多年來發展不俗，除咗被安排擔任大騷司儀，拍劇機會不斷，去年於劇集《妳不是她》更首度升呢做男一；另外，又被公司要求試鏡選秀節目《亞洲超星團》做「超星練習生」，丁子朗憑節目人氣急升，網民紛紛欣賞佢嘅努力嘗試，只係難以接受佢參賽時期嘅「小白臉」妝容及金髮K-Idol造型。近日，丁子朗於完結《亞洲超星團》後再次變更造型，卻被網民嘲整容，表示唔認得丁子朗。

丁子朗於社交平台PO出近照，包括騷肌照、出席麥明詩盛勁為婚禮照及產品宣傳照等等；從照片中睇到，丁子朗已將金髮染回深色髮色，比之前更陽光更有朝氣，網民都留言表示丁子朗終於返嚟：「即係順眼晒」、「正常返咪幾好」、「支持你試新既改變，但好開心終於見返我最鐘意既丁丁」、「咁樣啱你多啲」等等。有網民留意到丁子朗鼻頭比之前高、下巴翹咗、雙眼皮深咗等，五官疑似進化，認為相中嘅丁子朗完全與以前唔同樣，惹整容疑雲更留言勸佢停手：「點解又唔同咗樣」、「AI樣嚟嘅？」、「專心工作，唔好再整個樣啦」、「係唔係我錯覺？個樣又進化咗」、「你是誰？除咗整咗個鼻。應該仲整其他嘢。而家個側面完全唔識佢」、「我唔討厭丁丁，但希望外貌唔好再進化，再靚仔又如何？都唔係最真嘅你」等等。不過，有網民相信係化妝效果及P圖所致：「點會係整容，最多都係化妝技術超強，唔好睇小化妝嘅威力」、「化妝技術越來越好」、「P到」等等；而的確，丁子朗所PO嘅照片明顯見到P圖P到手指變晒形，但個樣就唔知係真係P圖P到咁定係靠化妝。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！