三大黃金中女視后 告訴你單身有何不可？

娛樂圈近嚟婚事連連，視后楊怡同羅仲謙下月就正式舉行婚禮，真係可喜可賀。其實唔少視后好似關詠荷、黎姿、胡杏兒、田蕊妮等都已經結咗婚，於是大家可能就會諗其他單身視后幾時先結到婚呢？視后胡定欣啱啱仲分咗手添⋯⋯之但係，邊個話女人就一定要結婚？成日問啲年過30歲嘅女性點解仲唔嫁，其實人哋都好想問點解要嫁！以吓呢3位視后們就話畀你知，與其關心佢愛情生活，不如睇吓佢其他方面仲好啦：

1.胡定欣

首先一定要講講上年出爐「視后」胡定欣啦，佢嘅感情生活時常受到關注，好似起初同吳浩康拍拖，後分手又被捲入同莊思敏罵戰事件，同馬國明分手又被人話佢「公主病」等。

但其實胡定欣嘅演技仲值得大家關注，胡定欣都係無綫電視藝員訓練班嘅一份子，不過初出道講嘢有少少懶音，飾演嘅角色又唔討好，經常做壞女人，所以未有人留意到佢。小編覺得佢做壞女人都唔係好表面嗰種，而係你會同情佢，甚至有點喜歡佢，好似《大唐雙龍傳》嘅婠婠同《搜神傳》嘅迦樓羅咁。之後胡定欣都積極爭取飾演唔同類型嘅角色，最令人記得一定係飾演《拳王》啞女一角。講真，其實不論忠奸、柔弱定堅強角色，胡定欣都做得唔錯，到上年終於捱出頭拎視后，今年《城寨英雄》更加確立咗佢可以獨當一面擔大旗，躋身一線花旦。

2.佘詩曼

「TVB一姐」佘詩曼（阿佘），成日被人標籤為「姣蛇」，因為幾乎同佢拍劇嘅小生都會傳出緋聞，而最為人知嘅一定係陳浩民同鄭嘉穎嘅戀情。而佢有個圈中好友團體「七姊妹」，幾乎全部都已婚，所以人人都好關注阿佘幾時有拖拍。當大家只掛住阿佘嘅戀事，不知不覺間阿佘嘅事業已經上到另一個高峰。

阿佘說實在真的係一個傑出嘅香港女演員，明明港姐出身，無接受任何專業嘅演技訓練，但卻可以由起初被人話佢雞仔聲，到後來做咩似咩，好似雖然小編覺得《使徒行者》劇情一般，但阿佘「釘姐」一角又真係做得好出色，特別係3個媽媽死而爆喊嗰場，唔係阿佘嘅話真係諗唔到當家花旦有邊個可以喊得咁有層次。阿佘最終成為香港第一個兩次獲得「雙料視后」嘅演員，然後喺馬來西亞、越南、新加坡、韓國、中國各地拎過不少獎項，更曾入圍電視界最高榮譽國際艾美獎最佳女主角5強。而近年阿佘更加積極打入國內市場，拍嘅每一套內地劇都係第一女主角，又成為內地綜藝嘅常駐班底。今年阿佘恢復自由身後，仲成立咗名為「佘詩曼+工作室」嘅個人工作室作個人發展，日後 所有工作都會由自己接洽，一姐真不愧為一姐， 絕對係代表到香港視壇嘅演員。

3.張可頤

張可頤曾經被封為「千禧年代無綫五大當家花旦之一」及「港視一姐」，而其實佢都無接受過正式嘅演員訓練，但無論做喜劇定係沉重嘅劇集，佢嘅演出都令人印象深刻。所以佢入TVB一年就已經被力捧，自96年《地獄天使》起無論經常擔當台慶劇或重頭劇集嘅第一女主角，幾乎每套劇都獲得視后提名，更憑《九五至尊》呂四娘一角成為視后。而張可頤參演嘅香港電視網絡劇集《來生不做香港人》，飾演控制欲極強的「港女」梁美行一角，更加被網民大讚演技精湛，特別係一幕「捍衛正體字」嘅演出。近年更轉戰內地，先後拍攝多套人氣劇集，累積了不少人氣。

除咗演藝事業，張可頤去年開辦咗尊子創作坊，除了提供創意手工藝同語言學習課程外，其實仲主力舉辦兒童及青年人情緒管理工作坊同講座，希望用自己過去嘅經歷，讓大眾多啲了解情緒管理嘅重要性。除此之外，佢仲有興趣參與電影幕後製作、寫劇本及做監製等。

至於愛情，年過40嘅張可頤都係逃唔過大眾嘅關注，不過佢自己就喺微博剖白心聲：「什麼時候找個男人嫁呢? 早就嫁給事業了，上天給我生活亦算快活自由，累不累？累！但心不累。活到今天，仍然認為，女性沒有什麼比自主獨立更可貴！女人需要男人，但不一定要依賴男人；選擇床上用品，也必須是品質好的優等貨，包括男人！~ 扎膚劣質的、令你睡不穩的確可免了。 」 有性格嘅張可頤，小編好欣賞，根本不需要理會別人的質疑。

圖片來源：胡定欣微博、佘詩曼微博、張可頤微博