下流上車族︳TVB引收視數字寸市場推廣人員唔識貨 行內人逐點KO︰ViuTV廣告費更抵
社交媒體唔只得FB同 Instagram,唔少人用嚟搵工嘅LinkedIn其實都可以同網友互動,甚至可以因應受眾係行內人,出post講行業相關資訊都得。
TVB喺LinkedIn都有account,早前就出咗個post,以台慶劇《下流上車族》收視高開為引子,仲話「第一集平均直播收視𝟮𝟮.𝟱點,第二集再升至𝟮𝟯.𝟮點。而另一個電視台同一時段嘅收視係𝟯點,計落𝗖𝗣𝗥𝗣(編按︰收視點成本)比𝗧𝗩𝗕貴𝟵𝟵𝟰% 」。「另一個電視台」當然係講緊ViuTV。
呢個post仲以質疑語氣,用行內人口吻問市場推廣人員(marketer)「點解 𝗖𝗣𝗥𝗣 貴到咁都仲要買?點解𝗥𝗮𝘁𝗶𝗻𝗴𝘀(收視)咁高都睇唔到?點解Marketers唔要高𝗥𝗢𝗜(投資回報)?如果你係marketers,你會點揀? 唔通你真係唔使同老闆交代?」。
專門研究廣告行銷嘅FB專頁「廣告狂人」就逐點回應TVB嘅詰問,例如以收視點成本計,ViuTV的確貴,但TVB嘅主要觀眾唔係客戶想要嘅層面。《下流上車族》收視係高,但客戶落唔落廣告唔止睇收視,仲要睇報導數目同網上討論熱度,而呢方面TVB冇優勢。至於「真係唔使同老闆交代?」呢點,「廣告狂人」指「正正就係要同老細交代,先至唔敢落TVB 。講到尾,收視再高,有生意先至最重要;Marketer 唔係傻,喺低收視嘅ViuTV 落廣告,竟然都返到數,喺ViuTV absolute廣告費平過TVB 之下,喺前者落廣告,其實更抵!」。
唔少市場推廣人同網友,都對於TVB出呢個post感到興趣,紛紛留言討論。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!