不抗拒與王浩信合作 陳自瑤賣口乖：演技要跟佢學

陳自瑤獲李居明指點後，機會即接踵而來，升呢做女一！講到有網友希望她跟視帝老公王浩信合作，她就坦言不抗拒，並會珍惜機會！

藝人陳自瑤（YoYo）昨日到新光戲院出席玄學家李居明監製的電影《大運同行》首映禮，同場還有張寶兒、傅嘉莉、江美儀、蓋鳴暉等人，YoYo透露獲師傅教她將錢箱、紅燈放在西南位，就可以更紅及旺女主人，師傅即表示：「佢嘅配音節目《好聲好戲》紅到發紫，多謝佢之前收平價，依家請唔起啦！」YoYo即笑言：「梗係冇加價啦！」講到她被爆將於選美劇首次擔任女一，她坦言：「依家未正式收到通知，如果係當然好開心。」她亦多謝汪明荃加持，希望有機會請對方食飯飲茶。

傅嘉莉獲李居明指點

講到老公王浩信表示配音技巧不及她，要向她好好學習，她即笑說：「因為佢冇玩配音啫，佢係兩屆視帝，演技都要向佢學習。（網友期望你哋有機會合作？）多謝大家支持，但呢啲唔係我話事，等公司安排。（唔抗拒？）我好聽話。（唔會尷尬？）冇諗，我好乖嘅，會珍惜機會。」

同場的傅嘉莉低胸上陣，大讚師傅犀利：「佢話我上年比較辛苦，今年就會睇好我，我之前啲劇集陸續出街，例如依家《刑偵日記》我就有好多福氣，同王浩信、黎諾懿、楊潮凱等5大男神有親熱戲。」她又透露獲師傅贈言行緊10年大運：「佢話3年前開始行緊，係慢慢漸進，咁我覺得都係嘅，例如啱啱拍完《凶宅清潔師》，係第一次做女主角。」

張寶兒明年或生B

張寶兒被問到師傅可有贈言何時生BB？她笑言：「師傅話明年同後年都有機會。（咁你準備好未？）順其自然啦，如果到就會知點做，好似結婚時都唔知咩叫做人老婆，會慢慢適應角色。」