不能一直走到最後 4對從螢幕走到真實的明星情侶

滕麗名（阿滕）近排因為劇集《一屋老友記》人氣急升，觀眾都讚佢好戲，想捧佢做視后。其實阿滕入行21年，小編一直好欣賞佢嘅演技，相信唔少人都仲好記得佢喺《陀槍師姐》入面做嘅陳三元，見證佢由男仔頭變成兩個小朋友嘅母親嘅成長。同樣因為呢套劇，佢同魏駿傑嘅九年情亦都令人好難忘。

其實香港娛樂圈都有好多係拍劇拍出愛花火，由螢幕變成真實情侶，但最終都無辨法走到最後，令一路睇住佢哋相識、相戀、分開嘅觀眾都好惋惜。不如睇下令到觀眾都有「分開簡單抹去往事極難」感受嘅4對由螢幕+真實明星情侶：

1. 滕麗名 魏駿傑

小編當年最覺得驚訝同可惜嘅就係呢一pair，點解？因為我真係追足4輯《陀槍師姐》，陳三元同程峰經歷咁多風風雨雨，搞到我已經分唔清劇集同現實，特別係陳三元被人強姦，程峰點樣小心翼翼照顧佢。現實中，阿滕同魏駿傑都成為咗情侶，人前人後非常恩愛，被人視為金童玉女，以為一定會結婚啦啦。點知道拍拖9年宣布分手，魏駿傑轉頭就同咗個後生女結婚，之後仲疑似罵阿滕賤人，好彩阿滕最後都搵到佢嘅幸福。入戲太深嘅觀眾，不如就將呢段愛情停留喺《陀槍師姐》最美好嘅時刻啦。

2. 胡杏兒 黃宗澤

胡杏兒同黃宗澤因為拍《我的野蠻奶奶》戲假情真，展開咗長達8年嘅戀情。當時TVB仲順勢拍埋續集《野蠻奶奶大戰戈師奶》，令觀眾開始中意上呢對情侶檔。早期佢兩個都唔肯公開承認戀情， 後來雜誌影到Bosco家中全裸，同時胡杏兒係隔離細心照顧佢，戀情成為半公開的秘密。2011年胡杏兒終於拎到「視后」發表「難頂」宣言，希望佢哋能夠一直頂住大家，第一次公開承認戀情。點知一年之後就分手，其實Bosco不時都傳出偷食傳聞，而杏兒最後2015年與圈外男友結婚了。

3. 鄭嘉穎 周麗淇

2004年，鄭嘉穎同周麗淇（Niki）因為拍攝劇集《天幕下的戀人》擦出愛火花，當時呢套港式偶像劇真係幾好睇架，佢哋首合唱歌《請講》真係好經典：想，想妳不會傷，想妳不要傷，想妳不再受傷～～之後佢哋再合作拍《最美麗的第七天》，當時大家都真係覺得佢兩個好襯架。不過後來傳出佘詩曼介入，最終Niki同鄭嘉穎5年情玩完，鄭嘉穎最近亦因拍劇集《殭》而與細22年嘅陳凱琳拍拖。

4. 陳豪 廖碧兒

陳豪和廖碧兒拍攝劇集《心花放》時撻著，開始咗佢哋六年嘅戀情。雖然拍拖咁耐都只係肯認係好朋友，但係成日一齊出騷拍廣告，早已係娛樂圈半公開嘅一對，亦好受觀眾歡迎。不過後來傳出廖碧兒背住陳豪另釣金龜林忠豪，被封拜金女。而當時陳豪接受訪問時仲話「可能我做得唔夠好」，真係一等一好男人，好彩而家佢都搵到生命中最重要嘅另一半陳茵媺，一家五口好幸福呢！

圖片來源：tvb.com