《不需要天天黏在一起的戀愛才長久》

剛開始戀愛嘅時候，大家都無咩安全感，加上新鮮感嘅影響之下，大家都會想見多啲相處多啲，或者呢個就係所謂嘅熱戀期掛。所以拍拖初期大家戀愛大過天係明白嘅，理解嘅，但去到後期，我哋就應該學識回到戀愛以外嘅生活。

除非兩個人一齊住，否則拍拖都係一件幾需要花時間嘅事。一星期得兩日假期，平日已經被滿滿嘅工作霸佔哂，咁要點利用淨低嘅時間就係關鍵。拍拖初期簡直想一星期七日都見，收咗工再仆出去食飯食到夜一夜先走都無問題。但長久發展下，我哋都係普通營營役役嘅打工仔，工作已經花光精力，我哋都需要愛情以外嘅空間。

同朋友家人食飯、同自己相處都係生活入面好重要嘅時間，所以喺關係穩定之後，就好應該抽番啲擺喺愛情嘅時間出來。但好多時情人就會覺得「你變啦～你唔再愛我啦～」但其實唔係愛情變得唔再重要，只係愛情踏入了另一個階段，唔再需要天天痴埋一齊，反而大家都可以有愛情以外嘅生活，咁樣先走得更舒服更長遠。