世界盃︳3分鐘入2球 南韓中鋒曹圭成一夜之間IG粉絲破百萬 被封「球壇朴叙俊」

尋晚嘅世界盃分組賽,南韓喺分組賽以2比3輸俾加納,目前2戰僅得1分,下場仲要對勁旅葡萄牙,要出線真係相當有難度。

喺尋晚場波,南韓2球入球都係由身高1米88嘅中鋒曹圭成頭搥頂入。貌似韓星朴叙俊嘅曹圭成,成為南韓足球史上首個喺世界盃「梅開二度」嘅球員,仲榮登網民熱搜人物,甚至佢嘅INSTAGRAM followers數目,喺比賽中途仲係八十幾萬,到完場後已經過百萬!曹圭成本來係韓國職業足球聯賽球員,本來人氣比起打英超嘅孫興慜爭一截,但係上一場世界盃賽事對烏拉圭以後備入替後,唔少球迷見到曹圭成高大靚仔,都立即搜尋此人是誰,令佢IG追蹤人數激增10倍,由本來4萬變成40萬!

曹圭成
曹圭成

今年24歲嘅曹圭成,19歲時已入選韓國U22代表隊,2年前加入韓職聯勁旅全北現代汽車。舊年因為服兵役,轉投次一級聯賽嘅軍人球隊金泉尚武,反而打出好表現,全季攻入8球,球隊亦奪得冠軍升班。曹圭成因為表現搶鏡而入選國家隊,並繼續效力金泉尚武,為球隊攻入13球。退伍後曹圭成重返全北現代汽車,仍然有唔少入波,更以全季17個入波成為神射手。

曹圭成
曹圭成

雖然曹圭成粉絲人數暴漲,但佢IG都係keep住得5個post,佢喺賽後對於成為新男神冇太大反應,仲話因為冇踢好啲而覺得遺憾。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!