中年好聲音︳有線出道浮沉多年 周吉佩曾被太太反對參賽

尋晚喺《中年好聲音－登峯之戰》，36歲嘅周吉佩（吉吉）以黑馬姿態力壓其他選手成為冠軍。過去幾周《中年好聲音》以排名積分賽決出6強時，吉吉表現都未見突出，直到上周「7進6」歌手合唱賽先至成為MVP，唔似得奪冠大熱李佳同龍婷一路領放，難怪觀眾都對賽果有意見。但其實周吉佩曾經參加過歌唱大賽，仲以歌手身份出過道，成為冠軍又未至於係爆冷。

周吉佩本身有8級聲樂資格，2007年22歲時參加有線舉辦嘅歌唱比賽《線動真音樂全港公開賽》取得亞軍，之後簽約成為有線旗下藝人。當年有線銳意發展音樂版圖，周吉佩參賽後第二年就有機會推出EP。當時第一首單曲《家教》陣容強勁，由Eric Kwok作曲林夕填詞，當年自稱因為打機而荒廢工作嘅Eric Kwok憶述，嗰年(2008年）只係寫咗5首歌，其中三首都係寫俾吉吉，其餘嘅仲有當年大熱《囍帖街》。

不過出完唱片之後，周吉佩嘅聲勢無以為繼，後來轉到有線及多間傳媒做主持，並且同朋友組成樂隊sp’ACE，曾經喺2019年舉行音樂會。參加《中年好聲音》時周吉佩報稱係活動搞手同埋司儀。

周吉佩喺有線工作時認識太太黃彥欣，而家佢地育有一對仔女，一家幸福美滿，但原來當時吉吉參加《中年好聲音》係冇問過太太，佢地仲因此嗌大交。後來周吉佩向太太派定心丸，話「唔使擔心，我唔同以前，唔係20歲嘅我，依家長大咗係一個好老公好爸爸」，因此相信老公知道自己做緊咩，唔止轉軚支持，甚至比吉吉更緊張。

早前YAHOO LUNCH K搵到同周吉佩一齊參加《中年好聲音》嘅曹敏寶一齊表演，當年佢地一齊參加《線動真音樂》而認識，阿寶係季軍而吉吉係亞軍，識咗咁多年難怪都仲會喺鏡頭前嗌交，friend呀嘛！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！