中年好聲音2︳60歲參賽者林潔淇身世坎坷 初生女兒被保姆虐待致死 細女險被掟落街

《中年好聲音2》尋晚播出第2集，唔少有實力嘅參加者都陸續出場。曾經係ViuTV歌手、參加過《全民造星3》嘅黃劍文、電影導演顏米羔都以出眾表現打入60強。至於孫耀威細妹孫美賢、王賢誌堂弟王賢訊都未能晉級。而素人身份參加嘅劉可獲得5盞燈入圍，但對答被評審陳慧嫻笑謂「係咪飲醉酒？」。

不過成晚得到最多節目時間嘅，係一位只得一盞燈而被淘汰嘅參加者，因為佢嘅經歷實在太催淚。

60歲參賽者林潔淇以《舊夢不須記》參賽，唱功未算上乘，本來不獲得任何評審俾燈。但林潔淇嘅故事先係戲肉，原來佢係長期病患者，曾患乳癌而康復，但乳癌後林潔淇動過6個大手術。

病痛以外，林潔淇一生遭遇多舛，童年及婚姻都十分坎坷，其中一個女喺2個半月大嗰陣因為被保姆虐待而夭折。喪女之痛纏繞林潔淇兩年，佢直言我日頭返工就扮冇事，可以同啲人客打招呼，但一收工就好難過，上車就會流眼淚。

林潔淇之後誕下細女，但婚姻再度破裂，細女仲爭啲被當時老公嘅家人掟落街。林潔淇話當時用盡全身力氣抱住細女衝出門口。林潔淇當時身無分文，後來靠努力工作養大個女。而林潔淇就係得個女鼓勵而參加《中年好聲音2》，選唱《舊夢不須記》，佢自言好喜歡唱歌，但係無機會學。身為媽咪嘅肥媽同車婉婉聽完林潔淇嘅故事都十分感動，而肥媽亦係唯一一位畀燈嘅評審。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！