中歐特色炭烤燒肉x本地精釀啤酒 大坑新開豬肉主題餐廳

大坑呢間新餐廳，兩位創辦人嚟自波蘭同意大利，呢兩個國家同香港嘅飲食文化都有個共通點，就係唔少得豬肉！因此餐廳以豬肉為主題，六成菜式都以五種豬肉創作而成：美國杜洛克豬、英國漢普夏豬、日本鹿兒島黑豬、意大利席恩那琴塔豬、匈牙利曼加利察豬，各有風味，炭燒烤肉更係必點。加上餐廳同本地精釀酒廠合作，供應獨家啤酒。

Porkcentric位於大坑，係附近Ask For Alonzo嘅姐妹店，不過就唔賣意大利菜，反而以德國、匈牙利、波蘭等地嘅美食為靈感。另一亮點係供應一系列風乾火腿，更係全港唯一一間可以單點波蘭風乾火腿嘅餐廳。

中歐風味前菜

正宗中歐風格嘅羅宋湯，以甜菜頭為主，加入大白菜、蘑菇等，味道清甜。加上蒔蘿、烤豬腩肉同酸忌廉，特別係烤豬腩肉可以增加焦香同脂香，倍添風味層次。

呢道傳統波蘭菜賣相平凡，但食落味道有驚喜。餃子裡面係芝士、薯仔同洋蔥，外面係牛油醬汁。芝士、牛油嘅奶香同薯仔、洋蔥嘅甜味好夾。

用手撕豬手作為餡料製作可樂餅，外脆內軟，而且食到一絲絲豬肉，口感豐富。配搭酸辣沙律、醃紅洋蔥可以平衡膩感。

牛肚鷹嘴豆燉菜嘅食譜嚟自大廚Giuliano羅馬嘅家鄉，醬汁甜中帶辣，牛肚非常軟腍入味，相當醒胃。配搭薄荷同烘過嘅麵包。

最啱Share！備長炭烤燒肉

精選橡果餵飼嘅西班牙伊比利亞黑毛豬，用肥瘦相間嘅五花腩部位做成燒肉，外層香脆，裡面嘅肥肉更係入口即化，瘦肉部分亦非常軟嫩。加上莎莎青醬、烤歐洲蘿蔔及蘋果片，一解油膩。

多人分享就要點呢份炭烤匈牙利曼加利察豬斧頭扒！曼加利察豬嘅特色係油花豐富，占60-70%，肥美甘香。大廚更於日本備長炭爐中額外加入蘋果木同壓縮木炭，令烤箱溫度更穩定，鎖煮肉汁及鮮味，同時帶淡淡天然甜香。口感細膩、肉香豐富，點埋墨西哥辣汁更香口。

燉豬手就選用英國漢普郡豬嘅原隻豬手，加入蘋果酒燉煮，蘋果酒嘅甜味融入豬手，令豬皮柔軟而唔爛，豬肉鬆化唔油膩。伴以扁豆、德式蘿蔔酸菜同烤蔬菜。

豬肉以外亦有烤海鮮同蔬菜，例如呢道香烤八爪魚，口感Q軟彈牙，越嚼越有鮮味。配搭紅菜頭辣根蓉及紅洋蔥香芹沙律。

多款蔬菜包括球芽甘藍、歐洲蘿蔔、蘆筍、西蘭花、薯仔等烤熟，然後灑上山羊芝士，最後淋上意式薩巴糖漿（Saba Syrup），帶出淡淡炭烤風味。

甜點之選

以蛋餅酥餅夾住自家製意式Nutella半冷凍甜點（Semifreddo），外層輕盈酥脆，夾心好似雪糕咁柔滑同入口即溶。可以配旁邊嘅雜莓同覆盤子醬，微酸解膩。

波蘭常見嘅甜品之一，用青蘋果切片加入香料製作而成嘅蛋糕，可以食到蘋果嘅酸甜滋味。再加上核桃雪糕，口感冷熱交替相當過癮。

同一般嘅拿破崙唔同，呢款Vanilla Bavarese夾心係巴伐利亞忌廉（Bavarian Cream），食落少一份蛋香而多一份厚滑口感。加上杏果醬同朱古力醬，甜而不膩。

獨家本地精釀啤酒

餐廳同本地精釀酒廠門神啤酒合作，抬頭就會見到餐廳天花吊住三個直立式啤酒缸，酒缸每個星期都會裝滿500升新鮮釀好、直送到店嘅啤酒！其中「蓮花宮特釀」更係餐廳獨家發售，亦會定期轉換款式，例如最近係蓮花宮熱帶風情，入口帶果香好啱夏天。

另一特色推介係呢杯米釀啤酒，以日本清酒米釀造。酒體輕盈、帶淡淡柑橘同米香。

Porkcentric

地址：大坑銅鑼灣道98號地舖

文、相：Cathy.H