中環全新概念阿根廷扒房 罕有齊備阿根廷牛、豬、雞肉

香港嘅阿根廷扒房有好幾間選擇，不過最「新」都應該係呢間喇～品牌喺香港紮根十多年，經歷搬遷、結業，最近以全新班底同形象，於中環新店回歸，罕有供應自家乾式熟成阿根廷式肉款，更少有地齊備阿根廷嘅牛、豬、雞肉！

餐廳主打嘅牛扒全部嚟自阿根廷，款式除咗主餐牌嘅21日濕式熟成草飼牛扒，重有每日限量供應自家製阿根廷式乾式熟成30日嘅阿根廷牛扒，主廚會挑選唔同部位，每日大約供應7份，想試最好訂座 時預訂埋。

開胃前菜+民族小食

阿根廷受歷史影響，都有融合日式元素嘅刺身料理，呢道醃北海道生帶子薄片，用自家製芫荽油虎奶醃北海道生帶子薄片，再配希靈魚籽作點綴，再唧少少青檸汁提鮮，味道酸爽醒胃。

去到當地必食嘅國民美食——傳統阿根廷餡餅Empanada大大隻，4款口味都係全人手包製。必試嘅Carne加入手切阿根廷牛肉配洋蔥橄欖，肉味香濃；Pollo餡料就有烤雞配羅勒波椒，微酸開胃；而Cerdo則有豬肉絲、香料青蘋果醬，juicy又唔覺得油膩；另外配合時下口味嘅Fugazetta，以三重芝士配焦糖洋蔥，啱晒芝士控！

阿根廷牛、豬、雞肉料理

Signature Cuts Menu集合主廚認為最美味嘅阿根廷牛肉部位，其中牛臀蓋扒快速用扒爐快速燒1分鐘多少少就可以上碟，而且肉味好濃厚，師傅只加少少鹽提味。為咗令食客更加體會當地食法，更配上6款醬汁，包括必蘸嘅阿根廷香辣醬chimichurri、mustard、salsa criolla等。

選用阿根廷豬肉製作嘅豬肉卷，面層鋪上多種芝士增加鹹香風味，而芝士下面重有焦糖洋蔥解油膩感，juicy得嚟鹹度適中。

阿根廷雞入饌嘅香烤春雞偏乾身風格，主要以迷迭香調味，配埋烤大蒜、唧烤檸檬汁就有份獨特嘅甜酸味。

手工意粉+特色「蛋糕」

自家製手工寬帶意粉煙韌彈牙，拌入松露汁食落香甜creamy，而黑松露雜菇、芝士則提升味道層次。

呢款甜品雖然叫「迷你阿根廷蛋糕」，但size唔算好迷你，細食嘅話2個人share都得。椰子蛋白餅加入焦糖牛奶忌廉醬做餡料，口感好似硬身嘅雪糕，內層有甜甜嘅椰絲，好啱椰子控一試。

TANGO Argentinian Steakhouse
地址：中環蘭桂坊15-16號協興大廈2樓

文：Cathy
相、片：Yan Yan