【二手旅行車】一次過滿足好多個願望

如果將跑車嘅性能、房車嘅舒適，同旅行車嘅實用，全部撈埋晒一齊，就會變成所謂嘅Sport Wagon。點先夠quali做呢種車？又唔一定要好好力嘅，2.0Turbo都夠架喇，冇性能但外表俊俏都可以，不過一定要有個好大嘅尾箱，足夠擺全家人嘅行李，車廂又要鬼咁豪華，皮櫳音響大天窗要有齊，一次過滿足晒咁多個願望先算Sport Wagon。

W204款嘅C Estate其實都幾型，最緊要裝AMG包圍。

可惜近年因為SUV、MPV、乜V勿V太流行，啲車種又溝得太過份，一時揭背車crossover跑車，一陣又四驅車crossover單門車，搞到車壇七國咁亂不突止，仲衍生咗一大堆怪獸，例如Juke、Qashqai、GLA之類之類，用外型做賣點搶佔傳統旅行車市場，最慘又真係有人買，最終搞到Sport Wagon愈嚟愈無人吼。
其實睇番近幾年，Sport Wagon除咗幾個歐洲大牌子嘅大車系，好似C仔E仔、3系5系、A4 A6之類，已經再無其他新意，以前啲愛快156/159 Wagon冇晒影啦，香港福士又唔再入Passat旅行車，就連富豪V40都由旅行車變揭背車，選擇少到咁嘅地步；日本陣營都唔好得去邊，早年嘅豐田Caldina GT4、三菱Airtrek Turbo-R、本田CH9 SiR等等，架架都係燴炙人口嘅Sport Wagon，不過而家老到退晒役俾你都唔要；原本掃把佬嘅LegacyGT Wagon都幾勇猛，09年轉款之前，即係BP款，個樣又英性能又勁，可惜後繼無車，轉款之後已經斯文咗好多，最新嗰架Levorg仲變埋千六Turbo；萬事得Mazda6 Wagon呢，一向都唔算好跑得，不過個樣幾討好，但係講鬼咩，新舊代理都唔願入行貨，成日話啲人得個問字，入咗都會唔買喎，所以只得零星水貨。

C仔個尾箱有幾好用，睇圖都明啦

冇新邊有舊？所以而家如果要搵架新啲年份嘅二手Sport Wagon，真係搲爆頭都諗唔到買乜好。三大德國品牌係有嘅，好似Ben屎咁，E Estate就太老餅喇，C Estate會後生啲，但中產味太濃，要買都揀（W204）Avantgarde版，即係鬼面罩有好大個星章嗰款，仲要有AMG Package先好買喎，加套包圍會型好多。以08年嘅C200為例，平極都15、16萬起，有AMG包圍仲會貴啲，要考慮嘅係佢用舊款supercharger機器，而且剛好夠期要驗；facelift後嘅C250轉用turbo偈，無論慳油同扭力都好過前期，但係二手價又無十幾萬呢支歌仔唱，2010車起碼都見2字頭。

E91 3系Touring個樣都算長青，facelift後頭冚多兩條骨線。

大部分旅行嘅後排椅背都可以摺，尾箱容量再大啲。

另一邊廂嘅寶馬，3系Touring都幾好，即使係上代（E91款）都仲幾襟睇，不過除咗335i之外清一色無Turbo，但勝在有直六機器揀，入門級323i約 12、13萬起，比C200平啲啲，同一道理如有M Package俾多少少都要揀，不過要留意都幾多水貨車，要驗清楚先好俾錢；5系Touring就咪搞喇，一陣俾人誤以為係警察車，個個怕鬼咗你。總括嚟講歐洲車引擎同波箱技術係先進啲，亦有比較多唔同c.c.、唔同增壓系統選擇，不過可能都要預番一筆維修費，始終電子系統多，淨係估邊粒sensor出事都要返廠篤電腦，咁就夠煩啦。

近年香港甚少入日本Wagon，Legacy GT Wagon係其中之一。

GT版有S.I.Drive配EJ20T引擎同AWD四驅。

日本車呢？都話冇新唔會有舊，所以近年真係得Legacy Wagon睇得下，BP款尾期嘅GT版唔錯，不過都已經係2009年車。呢個JDM日本版用嘅係2,000c.c. Turbo引擎，仲有S.I.Drive、大天窗同軚後+/-波拉桿，車櫳同尾箱都幾闊落，個樣斯文得嚟又幾惡，仲有原廠McIntosh音響，而家七至八萬都可能有交易，盡可能揀啲手數里數都低而且有原廠紀錄啦，始終係大馬力Turbo車，上手跟得好啲就慳你唔少麻煩。我嘅心水梗係呢代Legacy Wagon嘅Spec. B啦，六速棍波，車屋企人又得，自己玩又爽，係唔少有家室之士嘅Dream Wagon！

個櫳都幾豪，港版多數有大天窗同麥景圖音響。