伍樂怡狂扑余德丞要害 丁子朗激咀戴祖儀 咬爆唇見紅

無綫藝人丁子朗與戴祖儀於新劇有連場「愛情動作戲」，因咀得太忘我，結果子朗咬爆祖儀朱唇，見紅收場。而余德丞昨日於活動上，被伍樂怡喪「扑」要害，感受男人最痛！

丁子朗、余德丞、戴祖儀、伍樂怡、游嘉欣與林正峰等，昨日出席活動宣傳無綫劇《青春不要臉》，期間眾人玩「心口碎大石」，惟伍樂怡隔住道具石狂扑德丞要害，搞到男方即時推開道具石，並用手按實要害兼露出痛苦表情，事後笑言要「樁爆」對方報仇。

「入行以來最激」

子朗與德丞於劇中艷福無邊，德丞更與劉穎鏇及伍樂怡有咀戲，不過他表示只屬「蜻蜓點水」，有別於子朗與祖儀的「愛情動作戲」。而子朗自爆拍親熱戲時，因過分投入不慎咬爆祖儀的嘴唇：「整損咗佢個嘴，我有問佢個唇有冇事，不過佢唔care，好彩大家真係好朋友，所以拍嘅時候好自然同舒服，呢場戲算係我入行以來最激，我仲會扯祖儀件衫，總之大家見到破格嘅丁子朗。」

有溝通易投入

至於祖儀笑言：「我人生嘅印象未被人咬過，拍嗰陣痛咗一吓，後來先見到個嘴有血漬。（咁投入？ ）我哋好專業，大家合作過好多次，拍之前有溝通，令拍嗰陣可以好投入咁樣做。（會唔會咬出愛火？）呢3個星期佢係我唯一嘅愛，但我都期待下一個愛。」