何謂拍拖？點先算出軌？男女定義大不同

有無試過明明日日出街睇戲食飯拖埋手，佢都話我哋只係朋友？有無試過Whatsapp異性講咗少少曖昧嘅嘢，你另一半見到就火都嚟，話你背住佢偷食呢？定義呢樣嘢，真係好難捉摸呀！

海外婚友網站「兩顆紅豆（2RedBeans.com）」就做咗個調查，訪問咗1,192個世界各地華人，睇吓佢哋點定義拍拖同出軌。點先算正式喺埋一齊？73.7%受訪者認為要經雙方溝通確認先算係，81%女仔更覺得要清清楚楚講先算真係拍拖，只有10% 嘅人覺得拖過手就算拍拖。都話啦，可能娘娘畀你掂吓手仔只係派軍糧咋，唔好發夢自己升咗做將軍啦。

如果喺美國，情況更得意。美國東岸受訪者只有10%認為上過床就可以成為男女朋友，人哋覺得性同愛係可以分開架，所以去老蘭蒲，多數都當你SP（Sex Partner）咋，唔好咁認真啦。

咁畀你終於拍得成拖啦，如果同異性接觸得多又叫唔叫出軌呢？嗱，宜家最興就係有男/ 女朋友都不時用Whatsapp或者Snapchat同其他異性玩Flirting，以為咁樣只係玩吓？但原來51% 華人女性覺得咁樣做就係偷食，雖然同時只有36%男人認同。

拍得成拖難，繼續拍落去都難，都唔明點解要咁煩，鍾意就表白，有咗另一半就修心養性吓咪亂Flirt人啦。