何超儀自爆老公陳子聰病情好棘 傳曾嚴重內出血下半身癱瘓逾2個月

何超儀日前出席由已故國際時尚大師老佛爺Karl Lagerfeld設計嘅THE KARL LAGERFELD MACAU慶祝典禮，於活動上與何超瓊、超蕸、超鳳及四房子女合照，惟老公陳子聰（Conroy）未有現身。對於何家三房多位成員同場，何超儀坦言遺憾老公唔喺度，但陣間全家人會一齊食飯，又突自爆老公因身體出問題未能同行，唔係話一定會死，但病情好棘；直言心情唔好，自己狀態唔OK及好想爆粗，過去一段時間都忙於照顧對方，但稍後先會與大家報告老公嘅病情。

昨日（11日）有傳媒爆出，陳子聰去年到澳洲探父母期間因肚痛而入院檢查，並檢查到有數條血管撕裂致嚴重內出血，需即時做手術。手術之後，陳子聰昏迷逾20日，甦醒後下半身曾癱瘓2個多月。據報道指，陳子聰今年1月已可行走，本應需再接受手術，但澳洲、香港及美國都未能為佢做手術，於是只好安排返港休養。為照顧老公，何超儀暫時唔會接拍電影，並已安排24小時看護在家照顧老公；而其實陳子聰過往經常陪同何超儀出席活動，但自去年9月就無孖住出現，當時已有傳陳子聰健康出現問題。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！