《使徒行者3》曾舜晞人氣急升 流利廣東話出演有驚喜

無綫台慶劇《使徒行者3》演員陣容強勁，除咗有視帝視后級人馬之外，仲有內地小鮮肉助陣。近幾集出現咗一個身穿皮褸背心嘅型男殺手Madman（曾舜晞飾），佢仲聲稱自己係殺死釘姐（佘詩曼飾）嘅人，不過佢後來又澄清自己唔係Madman，而係新西蘭警方卧底混入Eternity進行任務。

香港觀眾應該對呢位青靚白淨又眼仔睩睩嘅小鮮肉感到陌生，其實佢就係今年只得23歲嘅曾舜晞。佢係深圳人，不過自細喺美國長大，之後去咗新西蘭留學，期間被星探發掘，入咗韓國JYP娛樂公司做練習生，所以佢精通國語、廣東話、英文及韓文。

曾舜晞喺2014年以組合「Fresh極客少年團」於內地出道，但一年後單飛，之後開始參與綜藝節目《 天天向上 》及拍劇。直到2019年，佢拍攝內地版《 倚天屠龍記 》，成為史上最年輕飾演張無忌嘅演員，人氣急升，成為內地炙手可熱嘅明日之星。雖然佢今次第一次參演港劇，仲同一班老戲骨有唔少對手戲，不過都完全冇比下去。另外，佢以流利廣東話原聲出演，加上唔少敏捷利落嘅動作場面，成功帶到唔少驚喜俾香港觀眾。除咗《使徒行者3》之外，佢仲有三套網絡劇《雁歸西窗月》、《慕南枝》及《說英雄誰是英雄》將會出街, 相信之後都有好多機會睇到佢演出。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！