《一個好女朋友就好似你阿媽》

一個好嘅女朋友就好似你阿媽，除咗照顧你囉唆你之外，同時都係一個口裡說不嘅人。尋日嘅情人節，各位男朋友應該見得最清楚。

女朋友同阿媽一樣，雖然係你出錢請佢食飯，但係會唔捨得你使太多錢，唔捨得食一個$500幾蚊嘅情人節套餐，會叫你有錢就留番佢儲起佢，會精打細算話你知食呢啲有幾唔抵幾唔化算。

女朋友同阿媽一樣，唔想你捱貴花就一早叫你唔好買花啦，但當你拎紥花送畀佢嗰刻，你都會見到佢表情已經出賣咗佢，已經笑到見牙唔見眼，但把口繼續話你嘥埋啲無謂錢。

女朋友同阿媽一樣，明明有嘢想要好耐自己唔捨得買，你話買畀佢，佢又會突然話其實都唔係咁想要啫。到你真係買咗畀佢，佢又會突然覺得內疚要你為佢用太多錢。

女朋友同阿媽一樣，把口話唔使慶祝啦無所謂啦，但其實最大願望都係你情人節（母親節）陪下佢，最想都係你陪佢好好食餐飯。

一個好嘅女朋友就好似你阿媽，已經超越咗羅蔓蒂克嘅階段，情願你踏踏實實留番啲錢。但當你為佢準備咗驚喜，佢又會口裡說不，一邊鬧你破費，一邊笑到嘴角都掂到耳仔。

如果你女朋友就係一個咁樣嘅媽媽型女友，千其唔好覺得佢不解溫柔唔識欣賞你為佢做嘅野，因為呢種女朋友先係最無私去愛你為你好嘅女朋友。