傳帶Jasper拍《爸爸6》袋4千萬！陳小春父子聞住氧氣樽上高山…

東方新地 - 娛聞

更新日期： 2018年7月29日下午8:00

一年一度，新一輯《爸爸去哪兒6》又開拍，今年湊仔公名單有內地男演員包貝爾、楊爍、耿樂、仲有范爺范冰冰細佬范丞丞做實習爸爸，卡士歷年最弱對香港觀眾來說好陌生，唯一熟悉面孔係陳小春同5歲囝囝Jasper！

又係陳小春？對！六年來第一次有父子兵冧莊，皆因暖男Jasper上季一鳴驚人成為最受歡迎星二代，今次酬勞再大幅度提升，由2,500萬人仔加碼變3,500萬人仔(約港幣4,032萬元），湖南衛視為咗同暑期推出的《想想辦法吧！爸爸》正面對撼，以小春父子狙擊朱茵母女，真人騷大戰一觸即發！不過日前應采兒在社交平台分享老公、囝囝及應爸應媽到四川稻城拍攝的照片，小春父子拎住氧氣樽聞，個樣仲有啲虛弱…

撰文：東方新地｜圖片：新傳媒圖片、陳小春IG、應采兒IG、應采兒fb、官方圖片、網上截圖

陳小春父子聞氧氣樽上高山…

應采兒在社交平台分享老公、囝囝及爸媽到四川稻城拍攝的照片，更留言話：「爸爸去哪兒第六季第二站稻城順利結束！海拔比較高、小孩子適應力比較強！」因為稻城海拔高達3700米，有機會引發高山症。從照片所見Jasper挨住外婆，由外公幫忙拎住氧氣樽去聞，樣子虛弱，令不少網民擔心。

至於陳小春身穿軍綠色外套，戴著黑超坐喺椅子上吸氧氣。

另一張相係Jasper陪外公外婆打麻雀，見佢咁生猛，大家都安心啲！

自《爸爸去哪兒5》播出以來，陳小春的四歲兒子Jasper（小小春）一直成為風頭躉，俘虜眾多少女心！除了他的懵呆樣子讓人感覺十分治癒，小小春在節目裡亦表現出他的可愛性格，成功及納不同年齡層的粉絲！

陳小春趁Jasper升小之前最後一擊

出世至四歲一直收收埋埋唔畀見樣，陳小春和應采兒兩公婆去年中突然讓兒子Jasper萌樣曝光，睇在人仔份上兩父子參演《爸爸去哪兒5》。Jasper憑cutie外形加上暖男性格，人氣在同輯星二代中一直領先、又帶挈父母工作量同叫價直線上升，節目尾段，粉絲網民紛紛大嘆不捨。直到上周，第六輯劇組在寧夏開錄現場相流出，小春同Jasper父子竟然亦在陣中，湖南衛視順應民意史上第一次翻炒父子檔。

據知情人士透露，酬勞加碼為賺人仔以外，應采兒確實認為去年的拍攝經歷對兩父子都係一個難得體驗：「以前主要係采兒留港湊仔，小春大部分時間都為工作周圍飛，冇乜時間喺屋企更加冇乜時間同Jasper相處。舊年錄完一季《爸爸》，兩父子感情大增、小春學識同個仔相處，Jasper更加變得獨立咗、生性咗，仲有好多節目畫面唔止感動觀眾同網民，亦都畀采兒睇到呢對父子另一面，佢覺得唔係搵錢咁簡單，呢個經歷有錢就買唔到。再加上Jasper開學就升小學，雖然係讀國際學校，但都唔想成日請假拍嘢，暑假唔拍等幾時？」

據知，小春父子今次身負重任，因為優酷製作的《想想辦法吧！爸爸》邀請了朱茵與阿Paul帶住囡囡黃鶯出鏡，《爸爸6》即重金禮聘小春父子冧莊上戰場，兩個親子真人騷準備在暑假硬撼鬥搶點擊率。

Happy birthday to my Super Jasper 😘 還好你爸媽都是演員、扮成什麼都不成問題🤣
應釆兒（@yingcaier）分享的貼文於 PDT 2018 年 6月月 30 日下午 10:37 張貼

為父子慶生

幫完囝囝慶生，又輪到老公小春51歲牛一，應采兒又係悉心準備大蛋糕為小春慶祝，順手farewell。

父子出發

其實早於個多月前已傳出小春、Jasper父子冧莊《爸爸6》，不過消息有待證實，直到上周二(10日)，小春收拾大篋準備出門、Jasper新相就講明係恤個靚髮出發，曲線默認。

外景曝光

父子呢頭出發，嗰頭網上就流出《爸爸》寧夏外景現場相，果然見到小春同Jasper同其他爸爸一齊錄影。

就讀國際學校的Jasper今年6月正式畢業，小春兩公婆認為開學升小之前的暑假冧莊拍多季正好適合。

#畢業啦##叻仔#💯
@Jordan（@jordan_chan_36）分享的貼文於 PDT 2018 年 6月月 14 日下午 9:17 張貼

囝囝變獨立

Jasper出世以來，小春負責搵家用、采兒就減低工作量湊仔為主，肯拍《爸爸6》，除咗錢，亦因為采兒覺得本來黐身、柔弱的Jasper被節目鍛鍊得獨立又硬淨，與爸爸之間感情亦因此大增。

應釆兒（@yingcaier）分享的貼文於 PDT 2018 年 5月月 6 日上午 2:40 張貼

長賺長有

拍完上季《爸爸》，除咗2,500萬人仔袋袋平安，惡爸爸被小暖男融化甚至在節目中落淚畫面亦感人肺腑，令一家三口尤其係Jasper人氣爆燈。

趁住暑假錄完第一輯，湖南衛視循例再食住氣勢拍埋電影版、賀歲版，小春一家三口一概有份參演。

應釆兒（@yingcaier）分享的貼文於 PST 2018 年 2月月 15 日下午 9:23 張貼

Jasper性格可愛又有喜感大受歡迎，帶挈埋父母成為內地真人騷搶手組合，先後參演《來吧兄弟》、《約吧大明星》及《三個院子》多個綜藝節目。

小春同應采兒同時又被多間廣告商睇中人氣邀請代言，先後夫妻上陣賣過電視同鉑金飾物廣告。

@Jordan（@jordan_chan_36）分享的貼文於 PST 2018 年 2月月 16 日上午 5:53 張貼

@Jordan（@jordan_chan_36）分享的貼文於 PDT 2018 年 7月月 2 日上午 12:32 張貼

破例接真人騷朱茵阿Paul 捧女袋千萬

內地真人騷《爸爸去哪兒》拍了五季深受觀眾歡迎，參與拍攝的明星二代全部都人氣急升，去年陳小春帶住兒子Jasper參加演出後，Jasper即成為內地炙手可熱童星，可想而知這類真人騷的入屋程度有幾勁。早前朱茵阿Paul亦解除防線，破天荒讓女兒參與由優酷製作的《想想辦法吧！爸爸》，節目名雖然只提及爸爸，但實際上卻是全家出動，朱茵才是最關鍵人物，因為參與的五位明星媽媽為了放鬆而组團外遊，五位明星爸爸就負責帶住仔女長途跋涉去搵媽媽。

朱茵六年前與阿Paul奉女成婚，同年10月黃鶯出世，朱茵一度引退專心相夫教子，前年才開始復出。

早前朱茵一家三口在北京機場出現，由於劇組要分兩隊拍攝，朱茵與其餘四位媽媽同行，爸爸亦要帶住仔女開始進行拍攝，當日朱茵到機場送別兩父女，年紀小小嘅黃鶯知道要暫別媽咪，攬實朱茵喊到收唔到聲，搞到眼腫腫鼻紅紅，十分慘慘豬，朱茵亦忍唔住跪地抱實囡囡喊，最後一家三口更擁作一團。

朱茵當日素顏現身機場，一手拉着行李，一手拖着黃鶯，同樣拖行李及孭住結他的阿Paul，則一夫當關在前方為妻女開路，man爆。

其實朱茵收到演出邀請後都好掙扎，思前想後先肯應承，據知情者透露，「咁多年嚟朱茵同阿Paul都堅持唔畀個女公開露面，想保護佢唔受傷害，等佢可以過普通人嘅生活，但個女開始長大，始終都要喺香港生活，避來避去都唔係辦法，佢兩公婆亦慢慢諗通，希望順其自然畀佢見多啲世面。前年朱茵孖住蔡少芬參演《偶像來了》及《王牌對王牌》等內地綜藝節目，人氣返晒嚟，工作亦接踵而來，咁啱年初內地製作人想搵香港明星家庭拍《想想辦法吧！爸爸》，幾經辛苦先游說到朱茵出嚟傾，對方好有誠意，因為要全家出動，又係Debbie(黃鶯)第一次公開出鏡，所以酬勞過千萬人仔，不過都辛苦㗎！阿Paul未試過自己對住個女咁多日，要連續24日帶住囡囡穿州過省搵阿媽，對於兩父女都係一個考驗。朱茵覺得呢個係一個好好嘅鍛鍊機會，有錢搵亦幫到阿Paul喺內地嘅知名度，最後亦應承咗，不過因為囡囡嚟緊就要考小學，暑假亦要開始準備，所以拍攝時間唔可以太長，劇組亦應承一個月內放人。」

臨近入閘，朱茵兩母女因要暫別而依依不捨，黃鶯當場爆喊，朱茵雙膝跪地緊抱女兒，同樣喊到眼紅鼻紅，更突顯其長長眼捷毛，被指仙女式落淚。面對此情此景，阿Paul亦攬住妻女齊齊喊。

極速與童黨混熟

黃鶯除了五官像朱茵長得標緻，亦遺傳了父親的藝術細胞，自小喜歡唱歌跳舞，由於出世後頭幾年都由朱茵全力照顧，為了不想女兒有公主病，朱茵賞罰分明絕不盲目溺愛，而黃鶯懂事自理能力又高，前年趁女兒已入讀幼稚園，朱茵開始全面復出，要工作的日子就把女兒交由外婆照顧。本刊記者曾多次目擊黃鶯跟隨朱茵阿Paul外出，只見她乖巧又聽話，而且待人亦非常有禮貌。

首次與女兒黃鶯一同參與真人騷的阿Paul，兩父女去到邊都形影不離，阿Paul展現出前所未有的慈父式笑容，抱住個女父愛出晒嚟。

節目在上月中開鏡，先後在雲南及成都等地進行拍攝，阿Paul拖住囡囡穿梭多個地方，不時被野生捕獲，平時Rock到爆的阿Paul對住個女冇晒火，全天候慈父上身，形象反差非常之大。從網民放上網的照片中可見，黃鶯已忘記與母親分別的離愁，即使沒有朱茵在身旁，與其他小朋友亦打成一片玩得好開心，而阿Paul則帶女洪郎賣土耳奇雪糕又學插花，做盡以往絕不會公開做的事。猶記得25年前黃家駒在日本上綜藝節目上意外出事，Beyond其餘三子此後對參與綜藝節目都非常避忌，看來有女兒作伴，阿Paul已成功克服陰影。

學插花

賣雪糕

節目內容包括多種生活體驗，阿Paul父女要與其餘四组家庭互相幫助一同解决難題，其中一站要去賣雪土耳其雪糕賺路費。

夫妻檔搵人仔

阿Paul父女上陣千里尋妻，反觀以朱茵為首的太太團就舒服得多，見她去完沙漠騎駱駝，又穿民俗服飾與民同樂，其中一日更與洪天明老婆周家蔚去大型超市掃玩具，不用湊女絕對是優差。其實生女後的朱茵復出後只放眼大中華，近年與阿Paul一齊簽內地經理人搵人仔，當年《西遊記》的紫霞仙子在國內依然有市場，拍劇拍電影之餘，仲代言唔少產品，去年更以天價酬勞為國內代言一種傳銷商品女性洗陰棒，為搵人仔接了不少前所未接的工作，包括今次全家亮相真人騷。

朱茵在內蒙古的鄂爾多斯現身，穿上當地的新娘服飾又試騎駱駝，原來紫霞仙子在當地知名度非常之高，去到邊都好受歡迎。

去到雲南站，朱茵穿上當地的民俗服飾拍攝，更與當地居民一起跳民族舞。

朱茵近年主力拍劇拍電影參加綜藝節目，阿Paul就繼續搞音樂開騷，論工作量與受歡迎程度，朱茵遠勝阿Paul。不過阿Paul為頭家亦發奮圖強，知情者透露：「為咗個女同頭家，阿Paul講嘢慎言咗，再唔會好似以前咁衝動，依家有內地經理人幫手，佢同朱茵都接落唔少job夫妻檔一齊上，咁樣個價高好多，喺內地知名度好重要，等個真人騷出埋街，阿Paul兩父女都會人氣爆升，到時肯定會有其他騷爭住搵佢哋做。朱茵今次捧女之餘，最大得著應該係捧埋個老公，絕對唔會計錯數！」一家三口殺入內地，錢途無限。