雅虎香港新聞 傳機師老公人工減半 何嘉莉復出錄製經典歌幫補家計
前英皇小花何嘉莉曾獲公司力捧，紅極一時，2006年淡出幕前做少奶奶，嫁予甜品店太子爺黃逸璋，誕下1子，可惜2014年離婚，婚姻維持8年。及後再次活躍娛圈，2015年與機師老公Gerald Sze結婚，並為對方誕下2女，除專心相夫教子，平日以時尚KOL身份分享扮靚心得，閒時旅遊享受生活。
可惜，受新冠肺炎疫情影響，有指機師老公人工減半，曾揚言唔想重返樂壇嘅何嘉莉，為減輕老公家庭壓力，重出江湖錄製首本名曲《兩種人》，幫補家計。對於計劃復出，何嘉莉表示唔後悔當年嘅決定，笑言被老闆楊受成及經理人Mani指，如當年繼續工作，人氣就如天后容祖兒及謝霆鋒一樣。其實前年何嘉莉上無綫節目《流行經典50年》再唱《兩種人》，獲大批網民力撐，相信復出絕對有唔少支持者！
對飛機師老公被傳減薪一半，所以她要復出樂壇幫補家計，何嘉莉回覆東網說：「其實復出呢件事，公司一路都有呢個計劃，同我傾咗好耐嘅，由嗰陣時簽番做KOL時，公司都有提過呢個構思，不過當時覺得咁耐冇唱，又擺低咗咁耐冇諗囉。直到最新有啲音樂project，又上過Harry（伍仲衡）個Live Show，公司就話點擊率真係好好，自己都睇到好多樂迷同粉絲支持，咁就覺得好喇，真係復出啦，唔好再錯過個機會，自己一路都好鍾意唱歌，之前放低咗呢件事去發展自己其他嘢，覺得今次係好難得嘅機會，所以決定復出，同其他問題係兩回事呢。」
