4大傳統芝士蛋糕推介 60年歷史食譜、清新紐約檸檬芝士蛋糕

每個地方嘅芝士蛋糕都各有特色，不過相信喺大家心目中最傳統嘅都係美式芝士蛋糕，一齊睇吓邊間啱心水！

1963年芝士蛋糕 文華餅店

位於香港文華東方酒店嘅文華蛋糕店，1963年芝士蛋糕係一款經典之作，事關自1963年以嚟一直保留住原有嘅食譜。主要用酸忌廉、忌廉芝士同杏仁粉製成，質感豐富綿密，帶有淡淡嘅堅果香氣，口感非常細膩。蛋糕頂層配上新鮮紅莓或者白朱古力片，為呢款傳統嘅甜點增添一絲清新同優雅，無論作為下午茶或餐後甜品都唔錯，留意餐廳有供應全個同件裝選擇啊～

紐約檸檬芝士蛋糕 Carbone

檸檬芝士蛋糕係餐廳嘅經典甜品之一，以濃郁嘅忌廉芝士作為基底，配合新鮮檸檬汁，帶出獨特嘅酸甜平衡味道。蛋糕質感細膩，入口綿密，加上檸檬嘅清新香氣，令每一啖都充滿驚喜，亦都冇咁易膩，食晒成件都冇問題。

芝士蛋糕專門店 Sbakery by Mama Soo

主打傳統紐約芝士蛋糕而聞名，小店強調回歸簡單與經典，佢哋嘅芝士蛋糕質感濃郁、味道豐富，芝士蛋糕底部好香脆，配搭厚實嘅酸忌廉，有濃厚奶香同微微嘅酸甜平衡，特別適合喜歡傳統風味嘅顧客。另外仲提供唔同嘅創意口味，包括藍莓、提拉米蘇同燒棉花糖等，適合鍾意有新鮮嘅朋友。

回歸最簡約的味道 Butter

主打經典美式蛋糕同甜品，回歸簡單嘅芝士蛋糕，選用香草餅乾作為底部，並以濃厚嘅忌廉芝士作為主體，口感豐富而紮實，充滿濃濃嘅奶香味，可以令人一啖就感受到純粹嘅芝士味道；伴隨著淡淡香草嘅清香，整體味道更加平衡而不膩。

文：Yanica
編：Cathy