元宇宙|藝人進軍元宇宙 張敬軒7位數建虛擬演唱會 林盛斌做展覽館業主

張敬軒
張敬軒

近年嘅藝人已經唔係只打一份工,發展副業、投資物業以外,仲玩埋NFT及元宇宙(Metaverse)。元宇宙即虛擬與現實結合嘅新生態產業,透過人工智能、虛擬實境、大數據等技術建構虛擬世界,從中進行社交及買賣等活動,一班藝人都跟上呢股熱潮。

張敬軒
張敬軒經理人公司英皇娛樂5月初宣布成立首個元宇宙項目,而張敬軒就係首位參與藝人。英皇娛樂投資約七位數字建立「HinsLand」並搭建張敬軒虛擬角色「HC」及多個場景,例如Fans Club、Meta-Avon Studio、起居室、歌劇院等等,其中歌劇院為未來虛擬演唱會場地,代表觀眾未來有望唔洗出門就睇到張敬軒演唱會;張敬軒工人姐姐「遮遮」暗黑早餐深入民心,而「HinsLand」內都有「軒公餐廳」可以品嚐到暗黑料理。

林盛斌
林盛斌(Bob)近日與企業家李志誠博士合作發展元宇宙地產項目,搵咗專業建築師設計「Artist Of Life」展覽場館大樓,希望打造一棟可供大眾紀錄生活及家族歷史嘅虛擬展覽場館。「Artist Of Life」內設藝術館,當中嘅展覽場可租用畀人做自己嘅展館,最細嘅單位有千三呎,價錢由幾千蚊到萬幾蚊一年不等。林盛斌仲表示,以前得大家庭先有家族紀念館,但希望元宇宙可以令到每個人都擁有一個二千呎地方,將自己嘅作品呈現出嚟。

林芊妤
林芊妤(Coffee)與多媒體製作公司Zenecom MCN合作開展元字宙計劃,喺虛擬實景商場中開設個人品牌Coffee Sweat網上虛擬商店,除咗Coffee虛擬人物出現及發布限定商品外,更會為用家提供虛擬試身、瑜伽課程,且會於用家購買瑜伽衫時直接連結至Coffee Sweat官網,令曝光率與生意額大增。

其實仲有唔少藝人踏足元字宙,包括舒淇、馮德倫、薛家燕、余文樂、韓國女團aespa、美國饒舌歌手Travis Scott、加拿大歌手Justin Bieber等;台灣藝人方面亦有林俊傑、陳零九、陳芳語等,隨時代變遷,相信元宇宙會於未來蓬勃發展,分分鐘係元宇宙中與藝人們做鄰居!

虛擬藝人「Medicine Man & A-POP」& 陳芳語
虛擬藝人「Medicine Man & A-POP」& 陳芳語
薛家燕
薛家燕

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能