《全民造星3》奪冠黑馬Cloud與CLC莊錠欣同為少女組合Honey Bees成員

ViuTV大型選秀節目《全民造星III》終極十強經已全部誕生，分別係李靜蓮（Alina）、陳毅燊（Ansonbean）、趙祥誠（Ben）、雲浩影（Cloud）、 陳澤言（CY）、黃劍文（Kimman）、劉瑞祈（KLAU)、葉巧琳 （Mischa）、鍾諾言（NY）及陳葦璇，總決賽將於本周六（26日）現場直播。今年只有22歲嘅Cloud，自細熱愛唱歌表演，原來佢曾經係「家燕媽媽藝術中心」嘅學生，與港產韓星CLC成員莊錠欣（Elkie）同期，出自少女組合Honey Bees。

雲浩影（Cloud）喺《全民造星III》表現備受注目，人氣急升。喺首輪淘汰賽唱出王菲嘅《開到荼蘼》，以三盞藍燈直入A組。之後佢每一次嘅表演都充滿驚喜，無論係深情唱歌定係演搞笑戲都難唔到佢，最後佢喺個人表演中獻唱《盡力呼吸》，以奪冠黑馬姿態殺入十強。

有樣有實力嘅Cloud，喺比賽中表現非常淡定，就算唔記得拎咪都冇怯場，原來係自小訓練有素。2010年只得12歲嘅佢已經喺歌唱比賽攞冠軍， 當時仲係由家燕媽媽頒獎俾佢。2011年成為家燕媽媽旗下少女組合Honey Bees成員，除咗有推出歌曲之外，佢仲經常有機會與家燕媽媽同台演出。睇返啲舊相，當時嘅Cloud樣子標緻，同而家嘅外貌變化不大，真係由細靚到大呀！

另外，亦有網民搵到Cloud 9年前喺錄音室翻唱Adele代表作《Rolling in the Deep》嘅片段，當時佢已經唱得好好，被網民封為小巨肺。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！