東張西望︳疑捲錢債桃色糾紛 袁晴晴參加《造星3》被花姐鬧爆 曾偷手機被定罪

TVB收視王牌《東張西望》連續2日報導一位名叫Coco嘅Model，先被指涉嫌同台式奶茶店金錢糾紛有關，然後再被爆同已婚男士發展，更向對方聲稱懷孕再索取掟煲費。從節目片段所見，Coco同曾經參加VIU TV選秀節目《全民造星III》嘅袁晴晴(Coco)十分相似！

翻查資料，袁晴晴歷來作品唔多，又試過惹上官非，《造星》監製花姐直情狠插Coco靠負面新聞上位，似乎鬧得啱！

以車模身份入行嘅袁晴晴，2014年喺「澳門亞洲車模」比賽攞亞軍，第2年喺「深港澳超級車模」攞「全國前十佳」，又參選過2015年環球國際小姐中國賽區香港代表。之後有做私影model，又做老闆娘開咗間珍珠奶茶店。Coco受訪時話自己讀書成績唔錯，會考有1A5B，但係見到做model打扮下就有唔錯嘅收入，於是輟學入行。

2年前袁晴晴喺街頭出席活動，有個自稱fans嘅男子「占士邦」當眾向Coco示愛，喺TVB真人show節目講過「有樓有高潮」嘅Seasun都喺現場，質問「占士邦」有冇名車豪宅。成件事似係夾埋做場戲，但係竟然連台灣媒體都報導，事後Coco仲話因此而「人氣急升」，接到個6位數嘅代言工作。

講到最爆嘅負面新聞應該係呢單︰2014年底，袁晴晴同自稱餐廳老闆嘅男子見面期間，拎走對方嘅手機，Coco因盜竊罪被捕，法庭判佢罪名成立，判處感化令一年及要賠償手機。案情指出，當日Coco同呢位男子先去名店 shopping，揀咗超過20萬元手袋首飾聲稱作為媽媽生日禮物，後來Coco叫對方代為碌卡找數，但該名男子表示信用額唔夠而拒絕，Coco向對方借電話打俾家人，點知一去不返，仲將手機屏幕劃花再丟落海。Coco被定罪後向高院提出上訴，話喺審訊先知事主只係廚師而唔係餐廳老闆，又話部手機係對方自願送贈當係「車馬費」。法庭駁回佢嘅上訴，指出Coco嘅行為已經足夠構成盜竊罪，而且採納事主而非Coco證供並無錯誤，因此維持原判。

袁晴晴舊年參加《造星3》，第一round已經因為表演水準太差，未出場就被勸退。當時花姐鬧得佢最甘，因為袁晴晴上台前笑騎騎做訪問，上到台就扮可憐喊晒口。花姐狠插袁晴晴靠負面新聞上位，但都俾機會佢參加出場，不過5位評判一致foul佢出局。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！