全民造星4丨梁祖堯及部分參賽者淪為攻擊對象 花姐IG出Story抱不平

花姐
花姐

ViuTV選秀真人騷《全民造星IV》嘅30強名單喺前晚(7日)正式誕生,不過網民對淘汰名單及B組導師梁祖堯嘅決定甚有意見,尤其見到之前連累隊友嘅方方仲喺到,但執生王Sica竟然被淘汰感到憤怒。自《全民造星IV》播映至今,唔少賽果及淘汰名單都不似預期,梁祖堯及部分參賽者成為被攻擊嘅對象,網民不停留言洗板鬧爆。節目監製花姐喺社交網站出限時動態,以黑底白字寫上:「因為咩事要攻擊佢地?勇敢為自己夢想努力嘅年青人,全力栽培年青人嘅導師。呢個世界本來充滿正能量,會越嚟越好,點解你地唔慶幸世界仲有佢哋嘅存在,反而要踐踏佢哋嘅努力。」

導師梁祖堯嘅B組有唔少高人氣參加者都被淘汰,例如咖喱、燒賣及Ash等等,去到前晚B組要額外淘汰多5名成員,最終Liu哥、Ana、阿杰、潔滢及Sica被淘汰。Sica表現愈見進步,再加上超強執生能力,得到網民喜愛,連花姐都大讚Sica叻女,網民紛紛留言戥Sica唔抵及將怒火指向梁祖堯,例如「方方失準唔記得連戲用阿婆聲唱,比評判批評,你留;Sica失準神執生比評判大讚仲要贏埋,你foul。梁祖堯你真係得」、「Karen都唔foul,癲咗」、「想話畀Viutv知,其實foul走sica同foul走Marf效果唔會爭好遠」、「個節目應該改名做全民造方」、「點解唔foul方方同Karen....」及「嚴重出錯既方方唔foul,用cosplay救你全組既sica就foul.搵人解釋下」等等。

《全民造星IV》截圖
《全民造星IV》截圖
花姐IG
花姐IG
《全民造星IV》截圖
《全民造星IV》截圖
《全民造星IV》截圖
《全民造星IV》截圖
《全民造星IV》截圖
《全民造星IV》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!