全民造星4｜咖喱遭淘汰 梁祖堯批進步慢 網民斥導師做得差：似選女劇團

ViuTV選秀真人騷《全民造星IV》繼續第三回合淘汰賽，噚晚（1日）播出一集由A5組對戰B3組，最後由高人氣嘅咖哩（黃雅慧）被淘汰，網民對結果感到不滿。

由Ika（廖芷嘉）、ZIVA（穎蕎）、超酸（陳昭煊）、芯駖（李芯駖）及Day（許軼）組成嘅A5組喺自選項目同指定歌曲《狂人日記》兩Round表現都獲評判狂讚，評判之一卓韻芝就覺得好驚喜，見到成員們唔同潛質。由Ivy So（蘇雅琳）、何榛綦（榛綦）、余潔滢（潔滢）及咖喱（黃雅慧）組成嘅B3組則以《猜‧情‧尋》作自選項目，加入童年遊戲於表演當中，陳詠燊直斥咖喱隻手戴住手鏈，又同其他人唔夾：「成個構圖我係咪甩咗啲乜？因為你哋連髮飾都冇顏色，全部夾得好，但你又著短袖，我嗰下突然有啲抽離。」

喺指定歌曲《狂人日記》環節，卓韻芝就話睇得出B3組喺演唱方面未熟練：「想知道佢哋頭先幾冇信心？或者要有幾多勇氣先做到？我睇到佢哋嘗試，但未成就到係一個演出嘅作品。」最後B3組落敗，準淘汰人選咖喱即時被淘汰，咖喱喊住咁發表感言：「呢3個月係好好嘅體驗，透過呢個節目，識到好多朋友，增加我舞台經驗，好開心加入B組阿祖大家庭，好warm。」

雖然梁祖堯解釋指，揀咖喱嘅原因係佢進步比其他人少，但一班網民似乎對賽果並唔滿意，紛紛留言：「問題死亡名單唔應該係咖喱」、「咖哩輸左唔緊要，始終唱歌唔係你強項，攞第一又唔代表會紅。」、「應該foul zoe（潔滢）啦，答問題都唔識答，都係靠咖喱出黎答。」等等。有網民仲表示，今次梁祖堯做《全民造星IV》導師做得好差，仲有偏幫之嫌：「原來佢揸晒主意情況會係咁惡劣，咁大偏見。方方救完一次又一次，潔瀅唔唱得唔跳得又唔foul，要foul咖哩。」、「item全部都叫人做戲，明明個選角係選人唱歌跳舞為主。即係推人去死」等等。對比都係導師嘅許廷鏗（Alfred），許廷鏗似真係選女團，而梁祖堯就似選女劇團。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！