全球出軌國家排行榜 排第一竟然係亞洲國家？

近排最hit一定係王寶強戴綠帽事件啦，娛樂圈出軌新聞日日都有咁濟，之前伍姑娘呀、譚小環另一半都偷食啦。成日聽中國大陸有好多小三、小四，咁到底出軌最多嘅地方會唔會係中國呢？

大名鼎鼎嘅杜蕾斯公司就同一間網上約會網站Match. com做研究，搵出結婚之後男女合計出軌比例最高嘅10個國家：

第10位：芬蘭（36%）

調查話5分1嘅芬蘭男人都試過婚後出軌，SP（Sex Partner）仲超過10個人，人數足夠組兩隊籃球隊喎～不過其實佢哋係開宗明義各玩各，嚴格嚟講就唔算偷食嘅。

第9位：英國（36%）

估唔到睇落保守嘅英國原來都咁高，都話密實姑娘假正經架啦，之但係偷食完又有差唔多50%男人後悔，又要食又要驚⋯⋯

第8位：西班牙（39%）

熱情如火嘅西班牙會偷食真係唔出奇，一個二個又係靚仔靚女，跳跳吓舞自然「興恰恰」，啪啪啪啦。之但係亂咁食梗係有後果，所以佢哋離婚率都係歐洲最高，達到60%。

第7位：比利時（40%）

見到比利時，我第一時間只係諗到朱古力，估唔到佢哋偷食都咁勁。根據一個專為比利時已婚人士認識SP嘅網站Gleeden，註冊會員有成110萬個，拍得住全球出軌人數嘅10%。

第6位：挪威（41%）

對唔住，我只諗起《挪威的森林》～ 其實揶威日同夜啲時間真係好極端，特別冬天日短夜長得咁過分，慢慢長夜無嘢做唯有啪啪啪都好正常，但係可能想有啲新意，咪⋯⋯

第5名：法國（43％）

法國幾乎個個總統都有情婦，但係法國民眾Just don’t care，因為有指法國人覺得出軌係「令生命豐盛的遊戲」， 63%法國男女都覺得出軌無問題，甚至只有28% 後悔自己曾經出軌。

第4名：德國（45％）

成日聽講德國人好嚴謹同認真，非常中意守規矩，睇嚟喺婚姻上又唔係咁喎，40%德國佬直情會同老婆講自己偷食，43% 德國女人亦都試過出軌，大家都一擔擔。

第3名：義大利（45％）

義大利又係一個迷人嘅國家，咁浪漫嘅氛圍下都幾容易意亂情迷嘅，不過偏偏佢哋離婚率又超低，一係就掩飾得好，一係就係大家都隻眼開隻眼閉。

第2名：丹麥（46％）

丹麥曲奇就食得多啦，丹麥人原來都幾鍾意「食嘢」， 佢嘅哥本哈根都出哂名係成人區架啦，梗有間係左近呀～

第1名：泰國（56％）

泰國人妖多，紅燈區都多，性行業發展薘勃，出軌機會都大啲。況且泰國始終都係男尊女卑，一個男人有二奶、三奶好常見。

估唔到10個出軌比例最高嘅國家，歐洲佔咗咁多， 果然西方社會風氣係開放啲，各玩各都無所謂。