全職媽咪新玩具～Vitantonio 窩夫機

Vitantonio 窩夫機終於有行貨喇，跟機有三個盤，另外暫時有七個盤可以配，黎緊仲有個cupcake盤出，對於而家每日都要快手安排牽牽點心同主食既我實在太實用喇，初三即刻仆落沙田city super買。（當日係第一日做promote ，坦白如果唔係自己一早瞭解晒部機先落黎，單靠當日既v仔自己既宣傳人員介紹，我係一定唔會買部機囉，又無笑容、問佢乜都好似唔知咁、示範既窩夫又做得唔靚，我都唔想打爛人飯碗，但真係應該返工前做啲準備先岩嘛，有乜理由乜都唔知唧？我知得仲多過佢，請我好過啦）不過算，我做晒功課先出手既，為左阿仔，我一定要做個小廚神媽媽既^_^

返到屋企都十點幾喇，乜材料都無唯有第二日先整啦，第二朝一早落街買材料、但原來初四有好多地方都未開工，最方便計，唯有買現成pancake粉試機啦，第一機安全啲好^_^

比我係雪櫃搵到之前用剩既紅豆蓉，yeah～ Pancake粉加蛋加包qoo豆奶攪勻就得喇^o^qoo豆奶本身有甜味唔使再落糖啦~本身又唔想比牽牽飲，自己又嫌佢甜，掉又浪費、而家用黎整餅fit晒（≧∇≦）

紅豆鯛魚燒話咁快就出爐喇，新鮮熱辣真係又靚又好味（≧��≦）之後我再試整左花生醬朱古力味、蕃薯、芝士、連新年既年糕我都整左落鯛魚燒入面做餡，估唔到又幾好味喎，軟綿綿既年糕加pancake粉原來都好夾架（≧∇≦）部v仔真係好好玩，岩晒我呢啲乜都夠膽死溝埋食既人呀，黎緊有排玩喇，要快啲買埋其仔盤先得。

作者: angeleung

原文:http://weshare.hk/angeleung/articles/4567505