「公主病」行為排行榜 「男友全額支付約會費用」只排第二？！

早前有單新聞，有個女記者驚整濕對鞋，所以叫災民抬佢，即刻被大家圍插佢「公主病」發作。呢個咁過份嘅要求，好明顯真係當咗自己係公主，但係一般拍拖約會嗰陣，做咗啲咩先會被人話你有「公主病」呢？

Pollster波仕特線上市調搵咗1,860個人做訪問，發現最「公主病」嘅行為係「使喚男友去排隊、跑腿」，高達21.9%，梗係啦，幫你排通頂買限量版手袋好似係老奉咁，你而家當個男友係阿四定奴才？24小時on call幫你做嘢仲慘過做兵⋯⋯

排第二梗係唔少得17%嘅「由男友全額支付約會費用」，一次半次男仔請就話啫，但而家搵食咁艱難，出次街都幾舊水，你又唔係無返工，佢請完你食飯，你咪請返佢睇戲囉，吓吓要男仔畀哂你都唔好意思啦。

排第三就係13.9%嘅「不拿包包，把男友當行動置物架」，成日都有人討論幫唔幫女友拎袋，講到咩男人尊嚴咁款，但係其實邊有去到咁嚴重？呢個都係態度問題啦，如果係嗰種無論個袋大定細，重定輕，毫無理由都一定要人幫你拎嘅就一定有「公主癌」啦。

不過好消息就係大家以為「不停自拍或叫男友拍照，直到有滿意的美照為止」 一定好乞人憎，點知得6.3%男仔覺得咁樣叫「公主病」，所以以後放心叫男友仔幫你慢慢影啦～