公司冇逼我跑馬拉松｜柳俊江生前片段播出 最後一幕藏洋蔥睇到好心噏

前TVB新聞主播柳俊江，今月初（5 日）輕生離世，終年42歲。柳爺生前有份參與ViuTV《公司冇逼我跑馬拉松》，噚晚（22日）播出嗰集以「謝謝陪你跑」為題，講到柳爺率領ERROR成員吳保錡（保錡）、曾贊學（阿神）、米露迪、李炘頤（Alina）及蔡寶欣（Pony）挑戰首個18km。喺完成挑戰後，節目組播出一段柳爺跑步嘅英姿，及寫上「謝謝柳爺陪我們跑完這段路！」作最後致敬，令人感動不已，唔少網民都表示睇到好心噏。

柳俊江喺噚晚播出嘅《公司冇逼我跑馬拉松》以陪跑員身份出場，帶領主持們及一班跑友練習跑步，期間柳俊江除咗好nice咁照顧人之外，佢仲安慰因狀態不佳而忍唔住喊嘅Alina：「你點啊？你不如唔好跑喇，太辛苦驚受傷。今日純粹為咗開心而跑，唔係Training嚟，所以唔好勉強。最緊要keep住能量繼續跑茖去，如果今日辛苦，就停一停。」及話：「長跑最緊要唔係一定要跑得晒，因為長跑係要有動力keep住繼續跑，若你受傷或辛苦，下次一諗起就會話我唔想跑，咁就玩完㗎喇。」

去到節目尾聲之際，節目組播出一段柳爺跑步嘅英姿，及以黑底白字寫上「謝謝柳爺陪我們跑完這段路！」作最後致敬。唔少網民感激製作組如常播出柳爺生前片段，同時表示睇到好心噏，例如「宜家望住柳爺個感覺怪怪的 好難想像佢走左 rip柳爺」、「柳爺真係好nice」、「見到柳爺話為開心而跑 就好心噏」、「見到柳爺鼓勵人好難過」、「最尾嗰幕喊咗出嚟」、「最後呢兩秒真係一野谷左啲眼淚出黎」、「最尾居然有洋蔥」、「最後睇到喊，心up」、「見到柳爺個心乸住乸住……」、「多謝幕後製作剪片團隊」、「柳爺…RIP 好好休息下」、「柳爺，多謝你，RIP」、「對柳爺致敬!」及「多謝同感激viu製作團隊用心，最後畫面好有意思好感人 May Lauyeah Rest in Peace 在天上開開心心繼續長跑同堅持！！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！