公司明捧MC張天賦 Jace陳凱詠準備加盟 傳衛蘭無癮約滿華納走人

近期有消息指，加入華納唱片8年嘅Janice衛蘭，有意今年約滿後同孖生妹妹Jill衛詩一齊走人。

有傳華納近年眼見MC張天賦、洪嘉豪等男歌手都發展順利，於是將資源投放喺2人身上，而同公司其他單位如Dear Jane、陳蕾等都有一定工作安排，甚至去年大擲百萬為旗下多位新人喺香港站走廊掛巨幅廣告宣傳。反觀Janice自去年7月開完紅館個唱後，近乎銷聲匿跡，加上盛傳事先張揚同環球等完約嘅Jace陳凱詠將會加盟華納，進一步分薄資源，令Janice決定約滿後掹埋妹妹衛詩一齊走。兩姊妹嘅IG已經唔見貼出華納嘅聯絡方法，似乎暗示離巢。

獲黎明賞識簽下嘅衛蘭，2005年出道後旋即上位，橫掃當年新人獎後更有多首歌曲大熱，但後來因為身型發福等原因而人氣下滑。2015年轉會傾約時，有傳Janice要求華納將妹妹衛詩一併簽下。加盟華納後Janice重新彈起，期間出過6張專輯兼開過2次紅館演唱會，華納更全力催谷聲勢，為Janice爭取到商台叱咤女歌手金獎。

Janice同Jill近期都係post下去旅行嘅相，據知Janice會去美國進修，並考慮效法姊妹兼教友嘅王君韾同鍾舒漫等，以獨立音樂人身份自組公司，爭取音樂上自主權。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！