冇錢溝女 唔好當真 袁偉豪派定心丸 讚張寶兒最靚

袁偉豪早前被重提曾向周勵淇示愛，昨日他出席活動時笑言大家不要當真，又向太太張寶兒派定心丸，指對方在其心中是「最靚世一」。而蔡思貝不欲重提選港姐時的「回憶」，覺得做人要向前看。

由蔡思貝、袁偉豪（Ben）、譚俊彥與譚凱淇等主演的無綫劇《廉政行動2022》即將播映，台前幕後昨日於電視城落力宣傳，身在內地拍劇的譚俊彥特別拍片打氣。首次拍廉政系列劇集的Ben表示有不少追逐戲，對於網民近日重提他多年前與周勵淇合作節目，當時他說：「我個銀包得嗰廿蚊，點夠膽追你呀？」引起熱烈討論，Ben笑言：「其實呢句說話喺內地嘅社交平台好流行，間唔中就有網民攞嚟用喺留言或回應上，不過我講緊嘅係25、26年前嘅事，當時我仲讀緊書，搭地鐵遇到個靚女梗係唔夠膽追啦！」

蔡思貝拒提選美舊事

他暗示當時只是戲言，叫大家不要太認真：「唔需要假當真，咁樣我都被搞到糊塗喇！（擔心太太張寶兒唔開心？）佢冇嘢，反而我未釋懷，希望大家日後高抬貴手。（有網民話張寶兒似李施嬅喎。）化妝啫，我對呢啲真係冇晒感覺。（覺得太太最靚？）當然啦。」

而蔡思貝難忘拍攝《廉》劇其中一場喪跑戲：「喺觀塘跑足幾條街，喺馬路穿插，加上要同鏡頭協調，所以都多NG。雖然跑到身水身汗，但好有滿足感。」對於新一屆港姐展開招募，身為師姐的她表示：「睇吓身邊有冇00後女生參加囉。（陳凱琳日前喺港姐特輯中，重提當年參選時受抨擊而落淚，你有冇辛酸史？ ）唔記得晒啦，我哋做人要向前看。其實參選港姐的確有好多難忘事，令當時嘅我發光同有所得着。」