再影床照No Way「電競女神」Rose Ma插洩密「叛」侶:係人格問題!

見過鬼怕黑,Rose揚言日後必定拒絕影床照。
見過鬼怕黑,Rose揚言日後必定拒絕影床照。

網紅兼「電競女神」Rose Ma(馬俊怡)去年捲入床照風波,已平復心情的她接受本報專訪。她直斥床照的「洩密者」是人格有問題,也破壞彼此信任,籲大家帶眼識人,揚言將來誓拒影床照!

27歲的Rose Ma出道以來備受宅男追捧,由於與日本前AV女優明日花綺羅撞樣,故有「香港明日花」之稱,社交平台坐擁27萬粉絲,人氣強勁。所謂樹大招風,去年8月網上就流出一批疑是她的床照,事後她表示已就此尋求法律意見。

拍拖怕怕 畀啲時間

捲入風波後近5個月,Rose已走出陰霾,並首度接受本報專訪,指現時心情愉快:「人總會有唔開心,要靠自己行番出嚟。我個人比較樂觀,冇乜大影響。」她指事件未有影響其工作,亦不擔心嚇怕追求者及令人留下負面印象:「身邊朋友向來知我係咩人,所以冇乜擔心,其他人要諗乜、要講乜,我都控制唔到。」她拒談有否被前男友要求影床照,但直言:「我向來覺得影呢啲相冇乜問題,係流出嘅問題,係信任同人格問題!所以大家唔好信錯人,要帶眼識人。」問到將來會否拒絕再影?她斷言:「梗係拒絕啦!」續指向來覺得互聯網沒有私隱,只能自求多福。提到被傳做「媽媽生」?她表示已採取法律行動,所以不會回應。

感情方面,Rose透露沒拍拖亦沒追求者,問到是否因為有陰影?她說:「哈哈,要畀啲時間。」提到新一年的展望,重新振作的她希望可以多在幕前演出,至於會否再推出寫真慰粉絲?她指要視乎大環境因素,而且疫情關係亦未能到外國影靚相。

收變態露械照

除了推出寫真外,擁34D導彈的她不時在社交網分享性感照,她直言經常收到性騷擾及約飯局的留言:「我唔會理,會Block晒佢哋。試過最變態係傳下體相,真係九唔搭八!」不過,她揚言不介意性感,亦否認刻意賣弄:「性感唔係咩一回事,純粹係有身材大家先會覺得你性感。我平時都係着T-shirt、牛仔褲,工作需要先着得清涼啲。(唔鍾意上圍太豐滿?)未至於,但大眾會覺得你賣弄身材,例如有個好瘦嘅女仔同我都係着背心,但效果好唔同,人哋就係文青,我就係賣弄性感。好多外國人Bra都唔着,因為我嘅身形就覺得我係賣弄。其實賣唔賣弄性感都好,最緊要係自己鍾意,我着得舒服,我接受到,唔一定要你接受。」

對於「女神」稱號,她自覺當之有愧:「呢啲係人哋講,唔會自認。每次司儀用呢個名介紹完,我都會話其實唔係,係『卡關達人』就真,打機經常過唔到關。從來唔覺自己係女神,我比較男仔頭,唔會嗲聲嗲氣,好粗魯。」