冰上火花｜網民呻AK及Lokman戲份少嘥晒：同2打6無分別

ViuTV運動題材劇集《冰上火花》早於開播前造勢強勁，MIRROR隊長楊樂文（Lokman）、副隊長江𤒹生（AK）及成員陳卓賢（Ian）積極於社交平台宣傳，因此一班鏡粉都對《冰上火花》寄予厚望。劇集將於下周一（20日）踏入結局週，唔少網民都對劇情發展產生緊張感，紛紛於社交平台及討論區討論劇情，不過有網民批評劇情愈來愈悶及故事線唔完整，更大呻AK及Lokman戲份極少。

《冰上火花》描述一班冰球運動員嘅成長故事，AK於劇中飾演暴風隊隊長王天城，Lokman則飾演暴風隊副隊長李世達，有網民就於社交平台及討論區表示唔明點解AK和Lokman佔咁少劇份：「先唔講劇情，但AK同Lokman啲戲份去晒邊？張立基仲多戲份過佢哋嘅喂！」，有網民舉出例子，指AK個角色成長嗰度可以鋪排多啲：「天城世達同2打6無分別」、「AK、Lokman成集又失蹤。睇嚟紅毛先係男二！」、「嘥晒我Lokman」、「雖然少戲份但好重要」等等。更有留言表示AK及Lokman似足《季前賽》嘅陳卓賢（Ian），事源就係Ian於《季前賽》擔任男主角，宣傳海報上位置亦與姜濤並列，但戲份就比呂爵安（Edan）、邱士縉（Stanley），甚至比葛綽瑤（Yoyo）少。

不過，都有唔少網民預咗佢哋戲份唔多：「其實佢哋戲份唔多都預左，有演出機會已經支持」、「都話主角係火花隊」、「每次佢哋即使做配角都得到贊（讚）賞，相信累積下來的經驗，就是將來成為主角的磨練。」、「個主線係火花隊，一定係咁拍。」、「我係想睇多啲lokman做戲」、「咁Lokman、AK都唔係主線...小畫面都正常姐」、「只係好明顯觀眾預期肯定唔係集集齋睇火花隊啦」等等。而AK同Lokman劇中表現均被網民大讚：「Lokman演技真係超班」、「隊長做戲真係一流，超喜歡睇Lokman」、「真係超正AK，雖然戲份小，但越來越演技好，又靚仔大隻，性格又唔會虛偽真性情，以前冇留意到佢，越嚟越欣賞佢」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！