出席仁濟慈善餐舞會 蔡思貝唱《戀愛預告》向Chantel挑機

視后蔡思貝前晚出席仁濟慈善餐舞會，並獻唱經典歌《戀愛預告》，莫非是要向「國民初戀」姚焯菲挑機？她又大爆日前拍劇激動爆喊，搞到睫毛液染污對手黃宗澤的恤衫！

蔡思貝、丁子朗、孔德賢、賈思樂、一眾港姐如黃嘉雯、鄺美璇、陳楨怡，以及仁濟醫院董事局主席黃楚淇女士、總理楊國佳先生、總理鍾培生先生等，前晚到香港瑰麗酒店出席「海外學生仁濟夜2021」慈善餐舞會，大會並邀得商務及經濟發展局副局長陳百里博士擔任主禮嘉賓，場面盛大。

被胡鴻鈞hurt爆

其中有份為慈善晚會演出的蔡思貝演唱了《戀愛預告》、《下一站天后》及《我的驕傲》3首歌，問到可是想挑戰「國民初戀」姚焯菲（Chantel）？她即謂：「唔敢當，只係想唱sweet同大家都識嘅歌。（有機會想開音樂會？）Never say never，依家專心拍劇，都會繼續搵老師學唱歌。」

問到歌唱老師可是緋聞男友胡鴻鈞？她即笑言不是：「我翻唱過佢首《到此一遊》，佢聽完之後叫我拍番戲。（好hurt？）冇嘅，我都係專心演戲，只係希望作為演員，唱歌唔好太失禮。」工作方面，她表示正忙於拍攝劇集《廉政行動2022》及《廉政狙擊》，預計9月底才拍完，又笑言後者的角色感情較澎湃：「幾日前拍咗喺後面攬住黃宗澤激動爆喊嘅場口，拍完之後佢背脊黑晒，因為我啲睫毛液甩晒落佢件恤衫，唔好意思咁問佢係咪私伙衫。」

子朗驚歌藝失禮

而子朗就身兼司儀兼獻唱《友情歲月》，問到可是「魔音」？他笑言：「都有啲驚，希望大家唔會聽到有生理反應（指嘔吐）。」而之前踩單車「撞爆鼻」的孔德賢則應景獻唱《單車》，見他雖然化妝遮掩傷口，但仍有傷痕，他坦言：「傷口仲有流膿，幾個鐘消毒一次，我有打破傷風針同食抗生素，每日都要搽藥膏同黐膠布。」