出道後愈來愈有女人味的4位女星

蔡卓妍（阿Sa）星期日同一大班朋友出海， 喺微博曬比堅尼靚相， 畀網友大讚「蜜臀、 纖腰、 細腿」，女人味十足。估唔到15年前Twins出道sell青春，個個都話阿嬌靚過阿Sa，點知而家阿Sa愈來愈正。其實圈中都有唔少出道後愈來愈靚 ，愈來愈有女人味嘅明星架：

1. 蔡卓妍（阿Sa）

阿Sa當年以組合Twins成員出道嗰陣雖然好紅，但係一來係Sell青春，二來阿Sa長期短髮look，所以通常啲人都話阿嬌靚啲，阿Sa就用活潑、可愛來形容。不過自從09年阿Sa出第一隻個人專輯開始，阿Sa就換上長髮新形象，漸漸由少女轉型做輕熟女，愈來愈有女人味啦。近日曬比堅尼靚相，33歲嘅阿Sa樣靚，身材fit到漏，真係越睇越正！

2. 謝安琪（阿Kay）

阿Kay 05年出道嗰陣，又箍牙又唔識化妝，再加上同張繼聰未婚懷孕，暫別樂壇，所以人氣唔高。後來一首《囍帖街》令阿Kay紅到街知巷聞，亦開始識化妝，五官立體咗好多，又敢於為民發聲，深受網民愛戴，陸續得到「樂壇天后」、「民主女神」、「高登首席女神」、「B餐人妻」嘅稱號。阿Kay而家已經由醜小鴨，變成好多人心目中嘅女神啦！

3. 鄧麗欣（Stephy）

其實Stephy以組合Cookies成員出道嗰陣，已經有唔少人覺得佢比較靚，不過始終有啲Baby fat，又唔係好識打扮，眼細鼻扁，未算得上係女神。之後陸續拍葉念琛愛情三部曲《獨家試愛》、《十分愛》、《我的最愛》留長頭髮，愈來愈靚。後來暫別返咗大陸發展3年，11年回歸香港開始走半熟女人路線。雖然同咗方力申分手，但係近年開始埋頭自己事業，組埋網球隊，愈來愈有女人味，當年鄰家女孩嘅感覺完全無哂～

4. 胡杏兒

胡杏兒雖然係香港小姐季軍，但Baby Fat顯得臉大，而且五官唔突出，算唔上靚。佢又成日做煩人角色，千篇一律嘅囧樣演技，更加令觀眾對佢無咩好感。但自從09年，胡杏兒終於擺脫爛好人角色，喺喜劇《巴不得爸爸》做騙子，開始令觀眾改觀。加上佢呢個時候Baby Fat無哂，《怒火街頭》利落短髮造型更加令五官突出，開始有女人味咗。之後拎埋視后，戲路廣咗，演技好咗，又識打扮咗，開始有觀眾讚胡杏兒靚。而家做埋人妻，真係愈來愈有女人味啦。

圖片來源：蔡卓妍@微博、Twins《女校男生》MV、謝安琪《你們的幸福》MV、謝安琪 《姿色份子》MV、Cookies 《心急人上》MV、鄧麗欣@Facebook、胡杏兒@Facebook、劇集《衝上雲宵》