《分手後，誰要做朋友？》

前幾日鄭中基演唱會請咗前度楊千嬅做表演嘉賓，大家都拍爛手掌戥佢哋再見亦是朋友感到高興。但其實我成日都唔明白，分咗手點解仲要做朋友？

好多啱啱失戀嘅人都會話想同前度做番朋友，因為好可惜乜乜乜， 嗰啲急住要前度留番一絲關係嘅人，根本就唔係純粹想同前度做普通朋友！說到底根本係自己仲未放低仲愛對方，先會覺得唔做情人都要做朋友！分手兩日就話要同對方做朋友，真係想做普通朋友咩？心照啦。

有人會話兩個人曾經相愛又好了解對方，分咗手就好似失去埋一個好朋友咁。係㗎，係好可惜呀，但係同一個曾經咁親蜜攬頭攬頸嘅人，點樣突然退後好多步做番個談笑風生嘅普通朋友？又如果係要做個好似以前拍拖咁無所不談嘅知己，咁咪即係掟煲唔掟蓋？

我成日覺得唔需要執著同前度做番朋友，因為無必要。如果你仲愛佢，就更加要斷絕來往，畀機會自己放低。如果你唔愛佢啦，做唔做朋友又有咩重要？每個前度都好似一個朝代，朝代沒落了，就由佢成為歷史。對下一任情人來講，都係公平啲嘅做法。唔係話要做仇人要做敵人，只係做番個「facebook式朋友」，一個like一句生日快樂就好足夠啦。